Туранда Улуг назылыгларның харылзажылга төвү ажыттынган

Россияның Социал фондузунуң Бии-Хем кожуунда салбырының баазазынга Тывада баштайгы Улуг назылыгларның харылзажылга төвү эжиктерин ажыткан.

Байырлыг ажыдыышкынга Россияның Социал фондузунуң Тыва Республикада салбырының удуртукчузу Светлана Кенден, Россияның пенсионерлер эвилелиниң регионалдыг салбырының даргазы Алла Хурума, Бии-Хем кожууннуң болгаш Туранда «Россельхозбанктың» салбырының төлээлери киржип, кожууннуң хүндүлүг хоочуннарынга, буурул баштыг эки турачыларынга байырын чедирген.

Туранда Марк Оюна аттыг культура болгаш дыштанылга төвүнүң «Оюнаарушка» ансамбли аалчыларга солун концертти бараалгаткан.

Төпте улуг назылыгларга компьютер клазы, дыштанылга өрээли, биче ном саңы, медицина булуңу бар. Чоорту хуралдаар залды септээш, стол теннизиниң залын ажыдып, аңгы-аңгы хемчеглерни (солун улустар-биле ужуражылгалар, тематиктиг кежээлер, делгелгелер, лекциялар, чогаал мөөрейлери, аъш-чем кылыр болгаш хол ижиниң мастер-класстары, экскурсиялар) эрттирип эгелээр.

Чаа ажыттынган харылзажылга төвү хоочуннарга саң-хөө, хоойлу-дүрүм талазы-биле билиглерин бедидеринден аңгыда хостуг үезин солун болгаш ажыктыг эрттиреринге таарымчалыг байдалдарны тургузар.