Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев Омск хоорайга Сибирь федералдыг округтуң Хоойлужудулга чөвүлелиниң хуралынга киришкен. Күрүне эрге-чагыргазының системазында тус чер бот-башкарылгазын организастаарының ниити принциптерин тодараткан федералдыг хоойлуну сайгарары база Ада-чурттуң Улуг дайынынга Тиилелгениң 80 чыл оюн демдеглээринге белеткелдерни хүн чурумунга киирген.
Бүрүн эргелиг төлээ хуралды ажыдып тура, Россияның Президентизиниң айыткан национал хөгжүлде сорулгаларын чедип алырынга регионалдыг эрге-чагырга органнарының болгаш тус чер бот-башкарылга органнарының чугула ролюн онзалап демдеглээн. «Кижилерниң чугула дилеглерин болгаш чидиг айтырыгларын дээштиг шиитпирлээр дээш, кады ажылдап билири эң үнелиг. Сибирь регионнары дөмейлешпес онзагай чүүлдерлиг-даа болза, кожа-хелбээ регионнарның арга-дуржулгазын барымдаалап, күжениишкиннерни мөөңнеп, дугуржулга туружу-биле ажылдап кылыр хөй-ле ниити айтырыгларлыг» – деп, Анатолий Серышев чугаалаан.
Тус чер бот-башкарылгазын организастаарының ниити принциптерин тодараткан федералдыг хоойлунуң дугайында чугаалап тура, хоойлу төлевилелиниң аңгы-аңгы кезектерин сайгарып, Россия Федерациязының субъектилериниң онзагайларын кичээнгейге алыр арганы бээр деңзигүүрлүг шиитпирни хүлээп алганын бүрүн эргелиг төлээ демдеглээн. Ынчап кээрге, регионнарга муниципалдыг округтарже долузу-биле азы районнар болгаш чурттакчылыг черлер-биле амгы ийи деңнелдиг модельди өскертпейн арттырар ийикпе азы кезектеп шилчиирин боттары шилип алыр эргени берген.
2019 чылдан Сибирьде муниципалдыг округтарны тургузар ажылдар чоруп турарын, бүрүн эргелиг төлээ дыңнаткан. Олар амгы үеде округтуң чеди регионунда бар. Кузбасста база Омск облазында ындыг административтиг-территориалдыг бөлүктерни эң нептереңгей ажыглап турган. Муниципалдыг округтарны тургузарының арга-дуржулгазын тус чер бот-башкарылгазын хөгжүдер айтырыглар талазы-биле Округ чөвүлелиниң хуралдарынга чаңгыс эвес удаа сайгарып, чаңгыс деңнелдиг модельдиң онзагайын угаадып, сибирьжи байдалдарга ооң ажылчы шынарын үнелеп, санал-оналдарны болгаш практиктиг ажылдарны солушкан.
«Бүгү ындыг чаартылгаларның кол сорулгазы хамаатыларның амыдыралының деңнелин болгаш шынарын бедидери болуп артар ужурлуг. Кол чүүлдү эрттирбези чугула – эрге-чагырганың муниципалдыг деңнели чон-биле эң сырый харылзааны, оларның күзел-соруу, сагыш човаашкыннары болгаш дилеглери-биле ажылдаар ужурлуг» – деп, бүрүн эргелиг төлээ чугаалаан.
Ужуражылганың киржикчилери Ада-чурттуң Улуг дайынынга Тиилелгениң 80 чыл оюн байырлаарынга белеткел ажылдарын аңгы чугаалашкан. Бүрүн эргелиг күрүне баштыңының сөстеринче кичээнгейни углаан – кым-даа кичээнгей чок артпас, кол-ла чүүл – шупту хоочуннарже сагыш човаашкынны көргүзери чугула деп демдеглээн. Ада-чурттуң Улуг дайынының киржикчилеринге кандыг-бир регионнуң азы муниципалдыг тургузугнуң «Хүндүлүг хамаатызы» азы «Хүндүлүг чурттакчызы» атты тыпсыр дээн Россия Федерациязының Камгалал яамызының эгелээшкинин Россияның Президентизи деткээнин база сагындырган.
Анатолий Серышев бүгү деңнелдиң депутаттарын хостакчы дайынчыларга болгаш хоочуннарга сактыышкыннарны мөңгежидер байырлыг хемчеглерни организастаар ажылче каттыжар кылдыр кыйгырган. Ылаңгыя Ада-чурттуң Улуг дайынының хоочуннарының чурттап турган черлеринге оларның аттарын сиилбээн самбыраларны кылырын организастаарын саналдаан. Хоочуннарның назы-харын барымдаалап, оларга байыр чедиреринге болгаш байырлыг хемчеглерге киржиринге эң-не таарымчалыг арга-хевирлерни шилип алыры эң чугула.
Россияның Президентизиниң салган база бир сорулгазын шиитпирлээринге депутаттарның боттарының соңгукчулары болгаш аныяктар-биле кады киржилгези чугула деп, бүрүн эргелиг төлээ чугаалаан: дайынчыларның тураскаалдарын, акы-дуңма чевеглерни болгаш аңгы орнукшуткан черлерин арыглап-аштап, долгандыр девискээрлерни чаагайжыдарда. «Күрүне баштыңы Ада-чурттуң Улуг дайынынга Тиилелгениң 80 чыл оюнга хамаарышкан бүгү хемчеглерни албан-езузу-биле эвес, а сеткилден эрттирерин кыйгырган" – деп, бүрүн эргелиг төлээ сагындырган.
