Тускай шериг операциязының дайынчыларынга тураскааткан Алдар аллеязын тудар черни тускайлаан

Тываның Баштыңы Владислав Ховалыг тускай шериг операциязының дайынчыларынга тураскааткан Алдар аллеязын тудар черни тускайлап бээрин шиитпирлээн.

Владислав Ховалыг тускай шериг операциязының үезинде маадырлыы-биле мөчээн оолдарның иелеринге ужуражып, оларның киирген дилээн сайгарып чугаалашкан.

Дайынчы оолдарның авалары кезээде сактып, оларга мөгейигни кылып, аныяк-өскенге мындыг маадырлар чурттап чораан деп чүүлдү сагындырып, төөгүге арттырары-биле “Алдарның аллеязы” деп аттыг тураскаал комплекизин тудуп тургузар черни, тодаргайлаарга, республиканың найысылалында тыва үндезин культура төвүнүң дужунда чер участогун аңгылап бээр дилегни киирген.

Тускай шериг операциязының үезинде маадырлыы-биле мөчээн дайынчы оолдарның авалары тураскаал комплекизиниң турар чери тодараттына бээрге, чижек-дөзевилелди шыйдырып кылдырарын чугаалааннар. Бо удаада шиитпирлээр айтырыг – аллея каяа турарыл деп.

Республиканың күүсекчи эрге-чагырга органнарының төлээлери Кызылдың 17 дугаар школазының чанында шөлге “Тиилелге сесерлии” кылыр планны шагда-ла киирип, “Чурттаар чер болгаш хоорай хүрээлеңи” национал төлевилелдиң күүселдези-биле ону чаагайжыдарын шиитпирлээн турган. Ол девискээрде ажылдарның бирги чадазы кылдынган: черни дескилеп тырткан, хөрзүн довуракты төп, ногаажыдылгазын чоруткан, дыштаныр девискээрни тускайлаан. Улаштыр тураскаал комплекизин тудар план бар.

Дайынчы оолдарның авалары ол чер төптен ырак, чоок кижилериниң чыглып алырынга таарымча чогун илереткен. “Иелери биске оолдарывыс – эмнеттинмес сорбу болуп чүректеривисте арткан. Ажыл-агый, орук-чорук аайы-биле, дыштанып-даа чорааш, улуг байырлалдар хүннеринде чыскаал соонда-даа чыглып алырывыста, бистиң дилээн черивис дыка эптиг болуп турар. Ону ажаап карактаарывыста-даа таарымчалыг” – деп, Любовь Дулуш чугаалаан.

– Тускай шериг операциязының киржикчилерин, мөчээн оолдарның маадырлыг чоруун мөңгежидер хемчеглерни деткиир мен. Иелерниң изиг күзелин үндезинге алгаш, Ленин кудумчузунуң эгезинде, Тыва үндезин культура төвүнүң дужунда черни тускайлап бээри чугула боор. Хоорайның ол кезек девискээри алызы барып улуг комплекс-даа апаар чадавас. Ында Ада-чурттуң улуг дайынының киржикчилеринге, афган дайынының хоочуннарынга, аңгы-аңгы дайынчы хөделиишкиннер дайынчыларга тураскааткан тураскаалдар бар. Ам ол черниң документ саавырын тургузуп, ону хоойлужудуп дамчыдар айтырыгларны шиитпирлээри чугула.

“Хоорай девискээрин база долгандыр хүрээлеңни чаагайжыдар” тускай сорулгалыг программага келир чылын киржип, чоннуң ол дээш бадылаашкынын организастааш, тускай шериг операциязының дайынчыларын мөңгежиткен Алдар аллеязын черле тудуп аптар бис – деп, Владислав Ховалыг шиитпирни үндүрген.

Тускай шериг операциязынга мөчээн оолдарның иелери хөй-ниити комитедин тургузуп алган ажылдап турар. Ам иелер оолдарның алдар-адын мөңгежидип, өөренип чораан школаларынга, ойнап өскен кудумчуларынга оларның аттарын тыпсыр, чурттап чораан бажыңынга тураскаал самбыраны азар дээн ышкаш ажылдарны хоойлужудуп алырының аргаларын шиитпирлеп, ол хемчеглерни боттандырарынга дуза кадарын Тываның Баштыңындан дилээн.