Тываның Баштыңы Владислав Ховалыг Бии-Хем кожуунга ажыл-агыйжы сургакчылаашкын үезинде, кожуунда ажылдап чурттап чоруур тускай шериг операциязының хоочуннары-биле ужурашкан.
Ужуражылганың киржикчилери кожууннуң амыдыралында эки өскерлиишкиннерни демдеглээн.
Аржаан сумузундан мал-маган тудуп турар Буян Адышаа социал керээге үндезилээн күрүне деткимчези-биле Туранда хайындырарынга белен аъш-чем бүдүрер биче цехти ажыдып алган. Ол бии-хемчилерни амданныг манчы, бууза, орама, манчылыг мүн, котлета, тефтельдери-биле хандырып турар.
Тускай шериг операциязының хоочуну Аржаан суурже кирер чаа асфальт-бетоннуг автооруктуң тудуу Аржаан, Тарлаг сумулары база Чкаловка арбанының чурттакчыларынга транспорт харылзаазын бүзүрелдиг хандырыптар улуг ужур-дузалыын демдеглээн.
Буян Адышаа тускай шериг операциязынга балыглангаш, ийиги бөлүктүң инвалиди болган. Ол суурунуң амыдыралынга идепкейлиг киржип, мурнуку одуругда дайынчыларга дузалажып, оларның өг-бүлелерин деткип, ачы-дуза чыылдазынга бодунуң үлүг-хуузун доктаамал киирип турар.
Турандан Сылдыс Ховалыг чеди ажы-төлүн чаңгыс боду кижизидип чоруур. Ооң уруглары өөредилгезинге база спортка тергииннер.
Тускай шериг операциязының хоочуннары көдээ ажыл-агыйны хөгжүдер «Агромотиватор» төлевилелинге киржир киржир күзелин илереткен.
Тываның Баштыңы ужуражылга соонда, төрээн кожуунунуң хөгжүлдези дээш көдээ ажыл-агыйы-биле туттунар күзелдиг тускай шериг операциязының хоочуннарын деткиирин бодунуң блогунда бижээн.
