Тывада тускай шериг операциязының инвалид хоочуннарының бажыңнарын хынаар ажылдар уламчылавышаан. Ол эгелээшкин амыдырап-чурттаарынга таарымчалыг байдалдарны хандырбышаан, инвалид дайынчыларның хереглелинге чурттаар черин дерииринче угланган.
Амгы үеде Тывада «Ада-чурт камгалакчылары» күрүне фондузунуң регионалдыг салбырының удуртканы комиссия бүдүн республикада 70 ажыг квартираны хынап, 32 хамаатының чурттаар оран-савазын дерээн.
ТР-ниң Күш-ажыл болгаш социал политика яамызының, Тудуг яамызының тускай мергежилдиглери база Бүгү-россияның инвалидтер ниитилели биле Күрүне тудуг чагыының төлээлери комиссияның составынче кирген. Хамаатының азы ооң төлээзиниң дилээ-биле комиссия чурттаар оран-саваны хынааш, аңаа херек таарымчалыг дериг-херекселдерни белеткээр.
Дайынчы хөделиишкиннер хоочуннарының хүн бүрүде амыдыралын чедингир болурун хандырар бажыңны ажыктыг дериг-херекселдер болгаш эт-сеп-биле четчелээр. Үн-биле башкарар бажың херекселдерин ажыглаар кылдыр «Угаанныг бажың» системаны кожар. Ынаар тускай оруннар болгаш кухня эт-севи-биле дерилге база кирген. Хоочуннар оон аңгыда персоналдыг компьютерлер-биле дериттинген ажылчын олуттарны алыр, ынчангаш олар ырактан өөренип, ажылдап болурлар.
Инвалид болганының хевиринден бажың-балгатты таарыштырар дериири хамааржыр. Чижээ, холу-буду чок инвалидтерге үн-биле башкарар сава-сакпыңнарны база угаанныг көжегелерни бээр. Инвалид тергези ажыглаар улуска эптиг шкафтарлыг кухня эт-севин салыр.
Бир эвес тускай шериг операциязының хоочуну ол бажыңның ээзи эвес, а ында чүгле бүрүткеттинген-даа болза, ооң чурттап турар черин эде кылып болурун демдеглээри чугула. Бо таварылгада өнчү ээзиниң чөпшээрели херек.
Ындыг деткимчени алыр дизе, дайынчы хөделиишкиннер хоочуннары азы оларның төлээлери «Ада-чурт камгалакчылары» фондунуң Тывада салбырынче азы кожууннарында социал харылзаакчыларже дилеглиг билдириишкинни киирер ужурлуг.
Дайынчы хөделиишкиннер инвалидтеринге деткимче хемчеглериниң болгаш өске-даа программаларның дугайында тодаргай медээни фондунуң бо адресте: fzo.gov.ru/ сайтызындан көрүп болур.
