Чөөн-Хемчик кожууннуң Чадаанадан тускай шериг операциязыныӊ киржикчизи Чойган-оол Серенчап социал керээге үндезилээн күрүне деткимчезиниң ачызында бажыңында чазаныр черни ажыдып алганын чагырга чери дыңнаткан.
Хостуг үезинде чазанырынга ынак шевер хирээлиг бичежек столду баштай кылып алган турган. Күрүнеден алган 350 муӊ рубль деткимче-биле станокту, өрүмнерни, демир кылыгларын быжыглаар, эгээлээр, соктап кылыр дөжүнү, ыяш хоюглаар машинаны садып алган.
Эгелеп чоруур сайгарлыкчы Улуг-Хем кожууннуӊ Шагаан-Арыгга төрүттүнген. Таӊдыга Межегей ортумак школазын дооскан Нижегород областыӊ Мулино хоорайга демир-орук кезээнге шериг албанын эрттирген.
Тускай шериг операциязы эгелей бээрге, Чойган-оол Серенчап 2022 чылда Россияныӊ Чепсектиг күштери-биле керээ чарып алгаш, Бахмутту хостажып тургаш, аар балыглаткан.
Чадаанада Чөөн-Хемчик кожууннуӊ Чонну ажылга хаара тудар төптүң ажылдакчызы Мария Кууларның дыңнадып турары-биле алырга, тускай шериг операциязының хоочунунга 50 муӊ рубльге материалдарны белеткээш, бажыңынга чедирип берген. Шевер дыка нарын чазаан көрүнчүк азар делгиирни сонуургаткан.
Чойган Серенчап школачы чылдарында-ла чазаныр, шеверлээр ажылдарга сонуургалдыг болгаш күш-ажыл кичээлдеринде-ле бажыӊ херекселдери столдар, сандайларны чазап турган.
Байырлалдар таварыштыр күзелдиг улус тос карак, далган өер, картофель хоюдар, ногаа кезер дээш оон-даа херекселдерни хөйү-биле чагыдып ап турар.
