Тускай шериг операциязының киржикчилери бизнезин ажыдарынга бир сая чедир рубльди ап болур

Тываның эрге-чагыргазы тускай шериг операциязының мурнуку шугумундан ээп чанып турар дайынчыларга боттарының хууда ажыл-херээн ажыдарынга белен. Республика ол сорулгага «СВОй бизнес» күрүне программазын 2025 чылда эгелээн. Ол программа дайынчы хөделиишкиннер хоочуннарынга сайгарлыкчы чоруктуң үндезиннерин өөредип, бизнес-төлевилелдерни ажылдап кылырынга акша-хөреңги деткимчезин алыр.

Бо хүннерде ТР-ниң Экономиктиг хөгжүлде болгаш үлетпүр яамызы тускай шериг операциязының киржикчилеринден ол деткимчени алырынга билдириишкиннерни хүлээп турар. Программаның негелдези-биле дузаның хемчээли бизнес-төлевилел өртээниң 50 хире хуузу болур, а алыкчы бүрүзү бир сая чедир рубльди алыр. Ол деткимчени дериг-херексел садып алырынга, чаа бүдүрүлгени тударынга азы бар объектизин чаартырынга ажыглап болур.

Тускай шериг операциязының хоочуннары-даа, оларның өг-бүле кежигүннери-даа субсидияже чагыгны киирип болур. Бизнесте бодун чаа шенеп эгелээн-даа, бут кырында тургустунуп келген хуу сайгарлыкчы-даа деткимчени алырынче кордап болур. «СВОй бизнес» программазынче, тускай операцияга киржип чорааннар азы оларның өг-бүле кежигүннери бүдүрүлгениң чаңгыс тургузукчузу – юридиктиг чер эрге-байдалдыг киржип болур.

Чагыглар хүлээп алыышкыны 2026 чылдың төнчүзүнде төнер болганда, бизнести организастаарынга субсидия алыр күзелдиг улус далашканы дээре. Билдириишкиннерни август 19-ка чедир хүлээр. Документилерни Кызыл хоорайның Тыва эки турачылар кудумчузунуң 18 дугаар бажыңында, 2 дугаар каътта, 212 дугаарлыг офисте ТР-ниң Сайгарлыкчы чорукту деткиир фондузунче киирер. Оон аңгыда 8 (999) 325-62-02 дугаарлыг телефонче долгааш, программа дугайында айтырып болур.

«СВОй бизнес» программаны Тываның Чазаа, ТР-ниң Экономиктиг хөгжүлде яамызы, Сайгарлыкчы чорукту деткиир фонд база «Россияның чөленгиижи» бүгү-российжи сайгарлыкчылар организациязының регионалдыг салбыры кады ажылдап кылганын сагындыраал.

Программа ажылдап эгелээнинден бээр ийи чыл четпээн үедургузунда, тускай шериг операциязының он-он хоочуну деткимчени ажыглап, рынокта боттарының ажыл-херээн ажыткан. Дыштанылга баазалары, дизайн студиялар, ательелер, кафелер, эт-сеп бүдүрүлгези, хевис аштаар ачы-дуза дээш, оон-даа өске төлевилелдер бар.