Кызылга эрткен ажылчын олуттар ярмарказынга тускай шериг операциязының киржикчилери болгаш оларның өг-бүле кежигүннери чүс ажыг анкетаны киирген.
«Россияда ажыл» кадрлар төвү биле «Ада-чурт камгалакчылары» фондунуң регионалдыг салбырының тускай шериг операциязының киржикчилерин деткиири-биле ийи дугаар эрттирип турар ярмарказы бо.
Бо удаада республикадан 20 ажыг ажыл берикчизи 400 хире хостуг олутту сүмелээн. Дөрт шак дургузунда хемчег үргүлчүлээн, ажыл тывыкчылары ажыл берикчилериниң саналдарындан аңгыда, регионнуң күш-ажыл рыногунда 1200 ажыг өске-даа хостуг ажылчын олутту база өөренип көргеннер.
ТР-ниң Чазак Даргазының оралакчызы Орлан Сарыглар, күш-ажыл болгаш социал политика сайыды Эдуард Сандан база «Ада-чурт камгалакчылары» фондунуң регионалдыг салбырының удуртукчузу Мерген Кызыл-оол хемчегни байырлыы-биле ажыткан.
Орлан Сарыглар тускай шериг операциязының киржикчилерин болгаш оларның өг-бүлелерин деткиири – Чазактың мурнады боттандырар айтырыы-дыр деп демдеглээн. «Чыл эгезинден «Россияда ажыл» кадрлар төптеринче 151 тускай шериг операциязының киржикчизи билдириишкиннерни киирген, оларның 67-зи ажылда тургустунган, 16-зы хууда ажыл-херээн ажыткан, а 14-ү чаа мергежилдерде өөренип турарлар. Дайынчы хөделиишкиннерниң хоочун бүрүзүнге ажылга хаара тудар планны аңгы тургускан» – деп, оралакчы дарга демдеглээн.
«Эльбрусметалл-Литий», «Тыва даг-руда компаниязы», «Лунсин» КХН, «Росчетки Сибирь Тываэнерго» АН дээн ышкаш улуг компаниялар ярмаркага киржип, хостуг олуттарны таныштырган.
«Эльбрусметалл-Литий» КХН-ниң хостуг олуттарын 40 ажыг кижи сонуургап, оларның 37-ү чугаалажылганы эрткен. Компания вахта ажылынче чалап турар. Росгвардияның Тыва Республикада эргелели дуңзаалакчыларны, полиция эмчилерин, ОМОН дайынчыларын, чолаачыларны, юристерни чалаан. 30 ажыг кижи консультацияны алган, 15 кижи баш бурунгаар хыналданы эрте берген.
«Лунсин» компания энергетика инженерлеринге, электри эптекчилеринге, электри каңнакчырынга, чолаачыларга болгаш өске-даа тускай мергежилдиглерге ажылчын олуттарны саналдаан. Оон аңгыда, ярмарканың киржикчилери Кызылдың ЧЭТ, ТР-ниң ИХЯ, РФ-тиң Кеземче херээн күүседир федералдыг албанның ТР-де эргелели, «Бастион», «Руммаркет», «В-Стройком» компаниялар, «Центр-А» хуу таңныыл компаниязы, 12 база 17 дугаар школалар болгаш өске-даа ажыл берикчилери-биле ужурашкан.
«Ада-чурт камгалакчылары» фондунуң регионалдыг салбырының дыңнатканы болза, тускай ярмаркага 150 ажыг кижи келген, оларның аразында дайынчы хөделиишкиннерниң 70 ажыг хоочуну бар. Кызыл хоорайдан база Кызыл, Каа-Хем, Таңды, Бии-Хем, Тес-Хем, Эрзин, Тожу, Мөңгүн-Тайга кожууннардан киржикчилер аңаа келген. Ярмарка үезинде, ажыл берикчилери-биле чугаалажылга чоруп турда, тускай шериг операциязының киржикчилери болгаш оларның өг-бүле кежигүннери 103 анкетаны киирген.