Тываның Баштыңының хамааты ниитилелди хөгжүдер грантыларын республиканың коммерцияга хамаарышпас 20 организациязы ойнап алган.
Бии-Хем кожууннуң «Энерелдиг сеткилдиң оруу» ачы-дуза фондузу кожуунда тускай шериг операциязының киржикчилерниң өг-бүлелерин деткиир «Ромашка» төвүн ажыткан.
Фондунуң удуртукчузу Наталья Ондар – Туранның 1 дугаар школазында ыры башкызы. Ол хостуг үезинде чонунга бараан болуп чоруур хөй-ниитижи бии-хемчилерниң бирээзи. Төпте алды идепкейжиден аңгыда хөй санныг эки турачыларны база хаара туткан.
Тускай шериг операциязының киржикчилерниң база долу эвес мөөңнээшкин-биле шериг албан-хүлээлгезинче кыйгыртканнарның өг-бүлелерин деткиир ажылды фонд эрткен чылын сентябрь 21 эгелээн. «Ромашка» төптүң кежигүннери өг-бүлелерге арга-сүмезин кадып, психологтуг дузаны чедирип турар. Төлевилел 76 өг-бүлени (69 школа назылыг уруглар) хаара тудар.
Төптүң байырлыг ажыдыышкынынга Аржаан сумузундан 12 өг-бүле киришкен. Аржаанчылар Тываның Баштыңының грантызының деткимчези-биле ук төлевилелди боттандырып эгелээнинге өөрүп, фондунуң ачы-буянныг ажыл-херээ чедиишкинниг, сайзыралдыг болурун күзээннер.
