Тускай шериг операциязының киржикчизи чымыштыг иште

Бии-Хем кожууннуң Аржаан сумузундан Аяс Сүрүнчүк – «Социал керээ» программазының 2021 чылда киржикчизи. Ол күрүнениң деткимчези-биле мал кыргыыр тускай дериг-херекселди садып алган.

Аяс Сүрүнчүк эрткен күзүн долу эвес мөөңнээшкинче кыйгырткан болгаш дайынчы хөделиишкиннер шөлүнде Ада-чуртун камгалап турар. Шөлээзи чымыштыг кыргылда үезинде таваржы берген-даа болза, ол чай аразында чаңгыс чер чурттугларынга ачы-дузазын чедирип четтигипкен.

Тускай шериг операциязының киржикчизинге баштаткан хой кыргыыр бригада шээр малды кыргып дооскан. Социал деткимче алыкчызы хой кыргылдазындан аңгыда малдың кажаа-хораазынга ветеринарлыг дезинфекцияны база чорудуп турар.

«Социал керээ» программазының киржикчизи өөнүң ишти-биле эге дээрезинде шээр малды хол хачызы-биле кыргып турганнар. Ам электрилиг мал кыргыыр машиналар арга-дуржулгалыг кыргыкчыларның ажылын улам шапкынчыткан.

Хой кыргыыр бригаданың ажылын чон бедии-биле үнелеп турарын суму чагырга чериниң удуртулгазы демдеглеп турар.

Үш ажы-төлдүг өг-бүлениң баштыңы удавас Ада-чуртун камгалаары-биле дедир аъттаныптар. Аржаанчылар чаңгыс чер чуртуунга база республикадан тускай шериг операциязында киржип турар дайынчыларга шериг албан-хүлээлгезин төлептиг күүсеткеш, онча-менди аал-оранынче чанып кээрин күзээн.

Аржаан сумузунуң чагырга чериниң даргазы Екатерина Тулуш хой кыргылдазы дооступ турарын медеглээн.