Тээлиде Улуг салгалдың харылзажыр төвүнге тускай шериг операциязының киржикчизи-биле ужуражылга болганын кожууннуң хөй-ниити организациязы дыңнаткан.
Бай-Тайганың херээженнер чөвүлелиниң кежигүннери, «мөңгүн эки турачылар» кыска шөлээзиниң үезинде келген маадыр оглун чылыы-биле хүлээп ап, ачы-дуза чыылдазының талазы-биле айтырыгларны салып, чугаалашкан.
Энелер аалчызынга гитара үделгези-биле ырларны күүсеткен. Олар дайынчыга тура-сорукту, кадыкшылды, тиилелгелиг чанып келирин күзээн. Солдат дайынчыларның мурнундан чаңгыс чер чурттугларынга деткимчези дээш четтиргенин илереткен.
Улуг салгалдың харылзажыр төвүнде «мөңгүн эки турачылар» болгаш идепкейжилер тускай шериг операциязында шериг оолдарга Шагаа байырлалын уткуштур чажыртынып шыптынар четкилерни болгаш кидистен кылган өл-шык эрттирбес олбуктарны кылып турарын сагындыраал.
Тускай шериг операциязында киржип турар дайынчыларга ачы-дуза чыыр пункт дараазында адрестерде ажылдап турар: Кызыл хоорай, Чульдум кудумчузу, 40А, өрээл 20, 21. (Улусчу фронтунуң регионалдыг салбыры), Ленин кудумчузу, 5 (Тываның күрүне университединде «Кады бис» штавы), Правобережная кудумчузу, 4 (Көдээ ажыл-агый рыногу). Харылзажыр телефону: +7 (39422) 2-10-50.