Абитуриентилер болгаш ада-иелер болганчок-ла тускай сорулгалыг өөредилге керээзиниң дугайында айтырыгларны салып турарын ТР-ниң Өөредилге яамызы дыңнаткан.
Тускай сорулгалыг өөредилге керээзин чарып алыры – мергежилиниң аайы-биле шилип алган өөредилге албан черин доозуп алгаш, келир үеде ажылдаар организациязы-биле (ажыл берикчизи-биле) керээ чарып алгаш, оларның мурнундан өөренип алыры болур.
Керээде дугуржулга ёзугаар айтып кааны-биле, ук организация өөредилге өртээн төлеп бээр азы өөредилге албан черин доозупкаш, чедип келирге, ажылче хүлээп алыр дээн чижектиг хүлээлгелерлиг болур.
А бир эвес керээ чарып алган студент өөредилгезин ара кааптар ужурга таваржыр болза, керээ чарып алган организация бодунуң абитуриентизиниң өөредилгезинче үндүрген чарыгдалын дедир негеп болур.
Ындыг керээни чарып алыры, абитуриентиге өөредилге черинче ыяап-ла кирип алган деп магадылалды бербейн турар. Абитуриентилер ындыг керээни чарып алган-даа болза, өөредилге черинче кирерде, тускай сорулгалыг өөредилге олуттарынче кордакчыларның аразынга болур мөөрейни албан эртер. Абитуриентиниң өөредилге черинче кирип алганы азы кирип албааны мөөрейниң туңнелинден билдинер.
