Тыл быжыгда, дайынчылар деткимчени эскерип, тиилелгеже бүзүрели улгадыр

Бөгүн Улусчу чогаадылга бажыңында «Бүгү чүүлдү тиилелгеже!» Улусчу полктуң эки турачыларының шуулгааны болуп эрткен. Шуулган Тываның эки турачылар шимчээшкининиң идепкейжилерин каттыштырган.

Амгы үеде республиканың муң-муң чурттакчыларын каттыштырган 120 ажыг пункт Тывада ажылдап турар.

Тываның Баштыңы [id360104045|Владислав Ховалыг] Улусчу полктуң эки турачыларының ажылын бедик үнелеп, байыр чедирген соонда, идепкейжилерге күрүне шаңналдарын тывыскан.

«Тываның чурттакчылары тускай шериг операциязының баштайгы хүннеринден тура демнежип, бистиң дайынчыларывысты деткип, ачы-дуза чыылдазында идепкейлиг киржип турар. Фронтуга дуза – бистиң кол сорулгаларывыстың бирээзи болуп артпышаан.

2022 чылдан тура Тывадан дайынчы хөделиишкиннер девискээринче 560 ажыг тонна ачы-дуза чүъгүн база 268 санныг транспортту чоруткан. Ол дузаны уламчылаар бис» – деп, Владислав Ховалыг чугаалаан.

Кожуун, суму бүрүзүнде эки турачылар пунктулары тускай шериг операциязының дайынчыларынга чугула херек чажыртынып шыптынар четкилер, оңгу лаалар, частыышкынга удур камгаланыр херекселдер, чылыг хөректээштер, аргаан уктар дээш оон-даа хөй чүүлдерни кылып турар.

Владислав Ховалыг чоннуң эп-сеткилиниң езулуг күчү-күжүн көргүзүп турар эки турачыларга, фронтуга дузалажып, тускай техниканы садып, дамчыдып берип турар сагыш човаачал чонга четтиргенин илереткен. Олар Тиилелгени чоокшулаштырар дээш үлүг-хуузун киирип, ачы-дуза чыылдазында идепкейлиг киржип турар.

Тываның Баштыңының даалгазы-биле «Деткимче» фондузу шеверлерни деткип, аргыттынып база дааранырынга херек материалдар-биле хандырар турарын сагындыраал.

Улусчу фронтунуң Тыва Республикада салбырының удуртукчузу [id446861578|Саима Далчин] күскү ачы-дуза чыылдазынга белеткенип эгелээнин дыңнаткан.

Амгы үеде дайынчы хөделиишкиннер девискээринде Тываның эрес-дидим оолдары мурнуку одуругда тулчуп турар. Тыл быжыгда, дайынчылар деткимчени эскерип, тиилелгеже бүзүрели улгадыр.

Эки турачыларның аразында тускай шериг операциязының киржикчилериниң болгаш чок болган маадырларның авалары, ачалары… бир демниг ажылдап турар. Олар Ада-чурт камгалакчыларының быжыг тылы болгаш идегелдиг чөленгиижи.

«Бүгү чүүлдү тиилелгеже, бүгү чүүлдү фронтуга!» деп кыйгы-биле Тываның эки турачылар шимчээшкини күжениишкинниг ажылдап, ачы-дуза чыылдазын тура дүшпейн чорудуп турар.

Тываның Чазаа болгаш Улусчу фронтунуң регионалдыг салбырының демниг күжениишкиннери-биле тускай шериг операциязында шериг албан-хүлээлгелиглерге ачы-дузаны доктаамал чыыр болгаш дамчыдар ажылдарны организастап турарын сагындыраал.

Чуруктарны Чингис Саая тырттырган