Бөгүн Сергей Пюрбю аттыг улусчу чогаадылга бажыңынга Иелер хүнүнге тураскааткан «Тылдың ишчилери – фронтуга» деп шуулган болуп эрткен.
«Бүгү чүүлдү тиилелгеже, бүгү чүүлдү фронтуга!” кыйгы-биле эрткен хемчегге республиканың аңгы-аңгы булуңнарындан 600 хире ава киришкен.
Тускай шериг операциязының үезинде амы-тынындан чарылган маадырларга сактыышкын минутазын чарлаан.
Амгы үеде дайынчы хөделиишкиннер девискээринде Тываның эрес-дидим оолдары мурнуку одуругда тулчуп турар. Тыл быжыг болурга, дайынчылар деткимчени эскерип, тиилелгеже бүзүрели улгадыры билдингир. Ада-чурттуң Улуг дайынының үезинде, тылдың ишчилери “Кызыл кош” улусчу шимчээшкининге катчып, карак кызыл ажылдап турган.
Тываның Баштыңы Владислав Ховалыг Иелер хүнү-биле чыылганнарга, тускай шериг операциязының киржикчилериниң аваларынга байыр чедирип, оларның маадырлыг чоруу дээш четтиргенин илереткен.
“Авалар – Ада-чурт камгалакчыларының быжыг тылы болгаш идегелдиг чөленгиижи. Республиканың аңгы-аңгы кожууннарындан херээжен улус Тиилелгени чоокшулаштырар дээш үлүг-хуузун киирип, ачы-дуза чыылдазында идепкейлиг киржип турар.
Дайын шөлдерден маадырларның чамдыызы эглип келбээн, оларның чырык ады кезээ мөңгеде сактыышкын болуп артар.
Чаңгыс уругну азырап өстүрери улуг күш-ажыл, үштен хөй уругну бут кырынга тургузары дээрге маадырлыг чорук-тур. Келир чылын хөй ажы-төлдүг өг-бүлелерни деткиир хемчеглерни калбартып, хөй-ниити автотранспорт, школачы база спортчу форма чарыгдалдарын эгидери планнатынып турар” — деп, Владислав Ховалыг чугаалааш, күрүне шаңналдарын тывыскан.
ТР-ниң хоойлужудулга болгаш күүсекчи эргелел органнарының инженер-ажыл-агый хандырыкчызы Анна Чаш-оолга Россия Федерациязының Президентизиниң Өөрүп четтириишкин бижиин тывыскан. Анна Шоюн-ооловна хеймер оглу 2022 чылдан тура тускай шериг операциязының киржикчизи.
Хову-Аксының уругларның уран чүүл школазының директору Аида Кууларга «Тыва Республиканың культуразының алдарлыг ажылдакчызы» атты тывыскан.
Тыва Республиканың Баштыңының Хүндүлел бижиинге Кызылдың 5 дугаар гимназиязының күш-культура башкызы Агафья Баяндай төлептиг болган.
Ол ышкаш Тыва Республиканың Баштыңының Өөрүп четтириишкин бижиин шылгарааннарга тывыскан.
ТР-ниң Дээди Хуралының Даргазы Каң-оол Даваа байыр чедириишкиннеринге каттышкан. Тылдың ишчилерин хүндүлээр езулал үезинде кожууннарда херээжен эки турачылар каттыжыышкыннарның эрес-шудургу ажылын үнелеп, өөрүп четтириишкин бижиктерин болгаш белектерни тывыскан.
Күстүң төнчү айының сөөлгү улуг-хүнүнде, Россияда Иелер хүнүн демдеглээри чаңчыл апарган. Россияның Президентиниң чарлыы-биле 1998 чылда доктааттынган ол хүннү бо чылын ноябрь 30-де байырлаар.
Чуруктарны Чиңгис Саая тырттырган