ТывКУ-нуң филология факультединде уруг чөргээр өрээл ажыттынган

Тываның күрүне университединиң филология факультединге уруг чөргээр өрээлди байырлыг байдалга ажытканын ТР-ниң Өөредилге яамызы дыңнаткан.

Россияның Чырыдыышкын яамызының организастааны «Аваңның өөрениринге дузалаш» федералдыг мөөрейге тиилелгениң ачызында уруг чөргээр өрээлди ажыткан. Чаа өрээлди чугула херек дериг-херекселдер-биле чүмээн: уруг чөргээр стол болгаш чаштарның чемин чылыдар херексел, идик-хевин солуурунга эптиг байдал дээш оон-даа өске.

Филология факультединде 100 хире ава бар: оларның аразында студентилер болгаш аныяк башкылар хөй. Факультеттиң деканы Надежда Сувандии аныяк авалар моон соңгаар таарымчалыг байдалга уруг-дарыын карактаар аргалыг дээрзин демдеглээн.

– Аныяк авалар кичээлдер аразының чапсарында азы шылгалда үезинде чаш уруг-дарыын таарымчалыг байдалга чөргеп, идик-хевин солуп, чаштың чемин чылыдып алыр аргалыг апарган. Шупту дериг-херекселдерни салган – деп, декан демдеглээн.

Университеттиң ректору Ольга Хомушку дээди өөредилге чери чаш ажы-төлдүг студентилерге болгаш башкыларга таарымчалыг байдалдарны тургузар дээш идепкейлиг ажылдап турарын чугаалаан. Ол ышкаш аныяк авалар өөредилге биле ие хүлээлгезин деңге күүседирин хандырар сорулга салдынганын демдеглээн.

#Өөредилгеяамызы #Тывку #ТМГМедээлер #Тыва #Тывамедээ #Тывадыл #Тывамедиагрупп #Тува