Тываның найысылалында «Тыва: Агроинвест-2026» II инвестиция шуулганында Россияның аңгы-аңгы регионнарындан, Кыдаттан база Моолдан 500 ажыг киржикчи киржип турар.
Тываның Баштыңы Владислав Ховалыг аалчыларга база киржикчилерге байырны чедирип, бо шуулган регионга анаа-ла ажыл-агыйжы ужуражылга эвес, а хөгжүлдеже чугула базым-дыр деп демдеглээн. Кыдаттан, Моолдан болгаш российжи регионнардан инвесторларның сонуургалы Тывада бүдүрген барааннарга хереглел барын бадыткаан.
Тыва Республика талазы-биле кол федералдыг инвестор Александр Вавилихин, Иркутск хоорайда Кыдат Улус Республиканың чиңгине консулу – дээрги Лю Юй, Моолдуң Увс аймааның губернатору – дээрги Эвэлсурен Насанбат, «Енисей Сибириниң хөгжүлде корпорациязының» чиңгине директорунуң оралакчызы Валерия Ступина байыр чедириишкинниг сөстерни алган.
Владислав Ховалыг ындыг шөлдерде болбаазырадылга цехтерин тудар база чаа бүдүрүлге объектилерин ажылдадыр дугайында дугуржулгаларны хөйү-биле чарып турарын айыткан. Эрге-чагырганың, эртемниң болгаш бизнестиң каттышкан күжениишкиннери-биле аъш-чемниң айыыл чок чоруун чедип ап, даштыкы рыноктарже үнер арганы чедип ап болур деп, ол демдеглээн. Тываның Баштыңы шуулганның киржикчилерге үре-түңнелдиг чугаалажыышкыннарны болгаш бот-боттарынга ажыктыг керээлерни күзээн.
Шуулганның пленарлыг кезээнче «Енисей Сибириниң агроүлетпүр комплекизиниң инвестиция хөгжүлдези» деп инвестиция сессиязы кирген. Тыва Республика, Хакас Республика база Красноярск край инвестиция саналдарын таныштырган. Ооң соонда көдээ ажыл-агый бүдүрүлгелериниң удуртукчулары, регионнарның төлээлери, адырның эксперттери илеткелдерни кылган.
Агроүлетпүр комплекизиниң инвестиция хөгжүлдезиниң аргаларын, көдээ ажыл-агыйны чурагайжыдарын, Енисейниң Сибирь регионнарында бүдүрүлгелерниң аразында кады ажылдажылганы сайгарып чугаалашкан. Дээрги Чжоу Цзыянь Кыдаттың Синьцзян можузунуң Джеминаиге көдээ ажыл-агыйның ажык-чарлыг болгаш кады ажылдажылгалыг шенелде девискээрниң дугайында илеткелди таныштырган.
Бөгүн шуулган элээн каш шөлдерге ажылын уламчылап, мал ажыл-агыйы, көдээ ажыл-агый продукциязының болбаазырадылгазы, мелиорация, мал чеминиң бүдүрүлгези, агротуризм талазы-биле төлевилелдерни таныштырар. Болбаазырадылга бүдүрүлгелеринче экскурсияларны болгаш продукциялар делгелгезин эрттирери планнаттынган. Көдээ болгаш аңныыр туризмин хөгжүдери-биле аңчыларның трофейлерин делгеп сонуургадыр.
Шуулганның кол сорулгазы – Тываның өске регионнар болгаш чурттар аразында ажыл-агыйжы кады ажылдажылга шөлүн тургузары. Хемчегниң түңнелинде республиканың агроүлетпүр комплекизин хөгжүдеринге идиглиг чаа дугуржулгалар чардынар.
Эрткен чылын эрткен «Тыва: Агроинвест» деп I инвестиция шуулганы Кыдат, Моол, Беларусь, Россияның регионнарындан төлээлерни чыгган. Ынчан кады ажылдажылганың 30 дугуржулгазынга атты салган, оларның чамдыызы чедиишкинниг күүсеттинип турар.