Июнь 23-те Улусчу чогаадылга бажыңынга Өвүр биле Мөңгүн-Тайга кожууннарның аржааннарын шинчилээр эртем экспедициязын болгаш Тываның аржааннарының дугайында номнар үндүрерин деткиир ачы-буян концерди болур.
Аңаа Тываның улусчу хөөмежизи Игорь Көшкендей, улустуң артистери Айдысмаа Көшкендей, Саяна Сат, алдарлыг артистери Галина Сүрүн, Олег Сат болгаш өске-даа уран чүүлдүң тергииннери киржир.
Концерт эгезинде Тываның алдарлыг эртем ажылдакчызы Кара-кыс Аракчааның Тываның аржааннарының дугайында кыска болгаш тодаргай лекциязы болур. Химиктиг эртемнерниң кандидады Кара-Кыс Аракчаа бүгү назынында Тываның аржааннарын шинчилеп келген.
Кара-кыс Донгаковнаның кылып чоруткан ажылдарының ачызында Тываның аржааннарының хөй кезииниң химиктиг составын болгаш олар кандыг аарыгларны эмнеп болурунуң дугайында билир бис.
Ада-өгбелерден салгал дамчып шилчип чоруур аржааннар дугайында билиглер чонда бар-даа болза, ону эртем талазы-биле бадыткаары чугула.
Эртемденнерниң кайы аржаанга кандыг аарыгны эмнеп болурунуң дугайында шинчилелдери, эмчилерниң аарыг кижини кандыг эм-биле эмнээрин тодарадып айтып бээри ышкаш болур.
Аарыг кижи өске эм ижиптер болза, аараан аарыын эмнээр туржук, өске эмге хораннанып, кадыкшылынга хора чедирип, амы-тынындан безин чарлып болур.
Аржааннарга хамаарыштыр база ону чугаалап болур. Аржааннар дээрге тодаргай аарыгларны эмнээр бойдустан чаяап каан эм-таң-дыр. Ынчангаш аржааннарже, оларның кандыг аарыгларны эмнеп болурун билип албайн чыткаш, болгу-келбиже кирери айыылдыг.
Тыва – аржааннар ораны! Шаг-төөгүден бээр билдингир, совет үеде-ле санаторий, курорттар тургустунган Чедерни,Үш-Белдирни Тывадан дашкаар безин чон билир.
Шивилиг, Сенек, Ажыг-Суг дээш-ле аржааннарга кандыг аарыгларны эмнеп болурун чүгле салгал дамчып шинчип келген билиглерден эвес, Кара-Кыс Донгаковна ышкаш эртемденнерниң шинчилелдеринден билир бис.
Ынчалза-даа Тывада ам-даа чедир шинчилеттинмээн аржааннар хөй болуп турар. Оларны чедир шинчилээри чугула. Ол аржааннар кандыг аарыгларга удур дузалаарыл деп эртемденнерниң тодаргай, эртемге даянган шинчилелдери херек.
Тываның аржааннарын шинчилеп доозарынга болгаш оларның дугайында ном үндүреринге дузалажып, июнь 23-те Улусчу чогаадылга бажыңынче ачы-буян концертинче чонну чалап тур.
Мерген Кыргыс
#Аржааннар #Шинчилелажылдары #Ачы_буян #Аржааннар #Шинчилелажылдары #Ачы_буян #ТМГМедээлер #Тыва #Тывамедээ #Тывадыл #Тывамедиагрупп #Тува #Tuva #TMG #TMGNEWS #Tuvanews
