Тыва Ажаалга банкызы-биле кады ажылдажылганы быжыглаан

Тыва Россияда болгаш Барыын Европада эң улуг универсалдыг банк – Ажаалга банкызы-биле кады ажылдажылганы быжыглаанының ачызында экономиканың шынарлыг чаартылгазынче базымны кылган.

Тываның Баштыңы [id360104045|Владислав Ховалыг] Санкт-Петербургтуң делегей чергелиг экономиктиг шуулганының үезинде саң-хөө организациязы-биле эчис сорулгалыг эштежилге дугуржулгазын чарганын МАХ национал мессенджерде бодунуң каналынга дыңнаткан.

«Ажаалга банкызы-биле кады ажылдажылга чүгле инвестицияны хаара тудар эвес, а чаа ажылчын олуттарны тургузар, тус чер мастерлерин болгаш ус-дарганнарывысты деткиир, тыва ылгавыр демдектерни бүгү-российжи деңнелче үндүрер арганы бээр» – деп, Владислав Ховалыг демдеглээн. Республика аажок улуг культурлуг болгаш бойдус курлавырларлыг, ону ажыдарынга амгы үениң технологиялары болгаш күштүг партнерлар херек дээрзин ол демдеглээн.

«Сбер» республикага идегелдиг болгаш чедимчелиг партнер кылдыр бодун бадыткаан. Тываның Баштыңы Владислав Ховалыг биле Ажаалга банкызының президентизи Герман Грефтиң хууда ужуражылгазының соонда баштайгы кады төлевилелдер эгелээн. Ырактан медицина ачы-дузазы, өөредилге программалары болгаш ипотека чээлизинде кады ажылдажылга чоруп турар. Ажаалга банкызы чээлилерниң хөй кезиин чиигелделиг ипотека программазынче тускайлаан, ооң соонда чурттуң Президентизиниң деткимчези-биле «Өг-бүлениң ипотеказын» чылда 6 хуулуг эвес, а 2 хуу кылдыр ажылдадыр арганы берген.

Тывада хан базыышкынын хынаар аппараттарны садып алганы-биле чергелештир, телеконсультация шөлүнден аарыг кижилерни ырактан хайгаараары нептерээн.

Владислав Ховалыг регионнуң банк-биле кады ажылдажылгазы баштайгы түңнелдери көргүзүп эгелээнин демдеглээн: ооң деткимчезинде школаларда болгаш хөй-ниити шөлдеринде 13 чаа спорт шөлү туттунган, а 2025-2026 чылдарда саң-хөө дузазының ниити хемчээли 156 сая рубль четкен, ону өөредилге, кадык камгалал, туризм болгаш хөй-ниити шөлдериниң хөгжүлдезинче угландырган.

Тываның Баштыңы республикаже кичээнгейни салып, үр үе дургузунда кады ажылдажылгага белени дээш Герман Грефке болгаш Ажаалга банкызының бүгү командазынга четтиргенин илереткен. «Тываның бурунгаар хөгжүлдезинче салдынган улуг планнарны кады боттандырып шыдаар бис дээрзинге бүзүрээр мен» – деп, Владислав Ховалыг демдеглээн.