Тыва бо чылын «Уруг бүрүзүнүң чедиишкини» төлевилел-биле 20 хире сая рубльди алыр

Чурттуң Президентизи Владимир Путинниң саналы-биле эгелээн «Өөредилге» национал төлевилелди боттандырып, эрткен чылын спортчу шөлдерни эптеп тургускан, ийи көдээ спортчу клубтарны чаа үениң дериг-херекселдери-биле четчелээн, Бии-Хем кожууннуң Туран хоорайның 1 дугаар школазының спорт залын септээн.

Тыва бо чылын школаларның спортчу инфратургузуун чаартыр ажылдарны база уламчылаар. Бо чылын «Уруг бүрүзүнүң чедиишкини» төлевилел-биле 20 хире сая рубльди алырын Тываның Баштыңы Владислав Ховалыг дыңнаткан. Ол акша-хөреңги-биле 13 көдээ школаларның спортчу инфратургузуун чаартыры планнаттынган.

Тываның Өөредилге яамызының медеглээни болза, бөгүн регионнуң өөредилге системазында уругларның немелде өөредилгезиниң 19 албан чери 20 муң оолдар болгаш уругларны хаара туткан. «Өөредилге» национал төлевилелдиң «Уруг бүрүзүнүң чедиишкини» федералдыг төлевилел-биле албан черлери улуг деткимчени ап турар.

Тываның аграр лицей-интернады федералдыг төлевилел-биле «Угаанныг теплицаны» ажылдаткан. Чаа шөл боду биолабораториялыг, материалдарны хайгаарап база чыырынга эптиг чер. Алдыгы классчылар немелде кичээлдер үезинде ногаа культураларын эгезинден эгелеп өстүрүп ажаар шенелделерни кылып турар.