Республиканың школа назыны четпээн уруглар албан черлериниң тыва дыл болгаш кижизидикчи башкылары профессионал билиин бедиткенин ТР-ниң Өөредилге яамызы дыңнаткан.
Уруглар садтарында «Төрээн Тывам» деп өөредилге-методиктиг комплекс-биле ажылдап турар кижизидикчи башкыларга болгаш тыва дыл башкыларынга «Школа назыны четпээн уругларның өөредилгезинге ФӨП боттандырарының этнокультурлуг компонентизи ("Төрээн Тывам деп чаарттынган программаның чижээнге") деп профессионал билиг бедидер өөредилге курстары ноябрь 6-8 хүннеринде болуп эрткен.
Баштайгы хүнде чаарттынган «Төрээн Тывам» деп өөредилге программазының ажылчын бөлүү боттарының тус-тузунда кылган ажылдары-биле таныштырган.
ТР-ниң өөредилге яамызының ниитизи билиглер килдизиниң специализи Урана Допул «Бодалдан практикаже: "Төрээн Тывам" деп ӨМК-биле чогумчалыг ажылдаары болгаш уругларның боттуг чедиишкиннерин көөрү» деп лекция-биле хемчегни эгелээн.
Чаартынган программаны чогаадыкчы бөлүктен тургустунган школа назыны четпээн уруглар албан черлериниң башкылары, кижизидикчи башкылары тус-тузунда аңгы-аңгы бөлүктерге "Төрээн Тывам" деп чаартынган программазы-биле таныштырган.
База шенелде шөлчүгештерниң кижизидикчи башкыларынга Ада-чурттуң улуг дайынының фронтуларынга тулчуп чораан Тыва Арат Республиканың эки турачыларынга төөгүлүг сактыышкын болгаш ат-алдар хүнүнге тураскааткан "Бистиң республиканың маадырларын утпас бис!" деп республика чергелиг методиктиг ажылдар болгаш кичээлдер мөөрейиниң тиилекчилерин шаңнап-мактаан.