Тыва дыл болгаш бижик найыры

Улуг-Хем кожууннуң 100 чыл ою, Шагаан-Арыг хоорайның 135 чылдаанынга тураскааткан «Тыва дыл, бижик найыры» Белдир-Кежиинге болуп эрткенин Национал школа хөгжүдер институт дыңнаткан.

Ук байырлалда шыдыраа, буга шыдыраа, ча адарының бир хевири – баг адары, кожамыктар, уран-номчулга, тыва ырылар мөөрейлери, «Билир сен бе» деп тыва чоннуң эт-херекселдеринге, аң-меңнеринге, үнүштеринге викторина, «Тыва дылым – дөзүм төөгүм» деп тыва дылга болгаш бижикке хамаарышкан ховар номнар делгелгези болуп эрткен.

Мөөрейлерге национал школа хөгжүдер институттуң директору Е. М. Куулар «Тыва ырылар мөөрейинге» II черни ээлээн. Этнопедагогтуг шинчилелдер лабораториязының ажылдакчызы А. К. Салчак «Билир сен бе?» деп мөөрейге II черни ээлээн. Аянмаа Салчак шыдыраа мөөрейинге база билиин шенээн.

Тыва улустуң оюну «Баг адары» маргылдаага 60 адыгжы киришкен. Эң-не бичии адыгжы 13 харлыг Айза Шивит Шагаан-Арыг хоорайдан. Шыдыраа мөөрейинге 30 ойнакчы ойнаан. Эң улуг ойнакчы 74 харлыг, а эң бичии ойнакчы 10 харлыг. Санкт-Петербург хоорайның сургуулу, 2022 чылда Европа чемпиону – Тамерлан Чындыгыр, ук мөөрейге тиилекчи болган.