Бөгүн Тываның күрүне университеди Улусчу чогаадылга бажыңынга Россия Федерациязының чоннарының төрээн дылга болгаш чогаалга өөреникчилер аразында II федералдыг олимпиадазының тыва дыл болгаш чогаалда шилилгелиг чадаларын эрткен өөреникчилерге байырлыг ажыдыышкынны эрттиргенин Национал школа хөгжүдер институт дыңнаткан.
Тыва Республикада тыва дыл, тыва литература эртемнеринге олимпиада школа, кожуун, республика чергелиг деңнелге чылдың-на эртип турар-даа болза, бо чылдан эгелеп, төрээн дыл болгаш Россия чоннарының литературзынга II федералдыг олимпиада Россия Федерациязының Өөредилге болгаш эртем яамызының 2022 чылдың август 30-де 828 дугаарлыг дужаалы езугаар 2022-2023 өөредилге чылында өөреникчилерниң олимпиадаларының даңзызынче киргени улуг чедиишкин болур. Ол дээрге тыва дылды, чогаалды бедик деңнелче көдүргени болур.
Байырлыг ажыдыышкынга Национал школа хөгжүдер институттуң директору Елена Куулар төрээн тыва дылынга болгаш чогаалынга баштайгы шылгалдаларны эрткеш, түңнел чадага боттарының билиглерин көргүзүп келген шылгараан өөреникчилерге, оларның удуртукчу башкыларынга байырны чедирген.
