“Тыва дылдың чажыттары” мөөрейниң тиилекчилери

Кызылдың 15 дугаар лицейинге школалар аразынга Төрээн дыл хүнүнге тураскааткан “Тыва дылдың чажыттары” деп мөөрей болуп эрткенин Национал школа хɵгжүдер институт дыңнаткан.

Ук мөөрей чылдың-на чаңчыл езугаар эрттип турар. Бо удаа 15 дугаар лицей эрткен чылын тиилекчи болганындан мөөрейни бүрүнү-биле харыылап эрттиргени ол.

Лицейниң тыва дыл, чогаал башкызы Алимаа Херел найысылалдың 13 школаларының аразынга билиглер марафоннун тыва дылга болгаш төрээн чуртунуң дугайында уругларның бот-тузунда билиин сайзырадыр дээн сорулгалыг эрттирген.

Школаларның өөреникчилери болгаш башкылары аажок идепкейлиг чыглып кээп, байырлыг болгаш шыңгыы байдалга билиин хынажып, мөөрейлешкеннер.

Команда бүрүзү тус-тузунда тускай чараш кеттингеннер. Ылаңгыя 5 дугаар гимназияның «Үш ыдык» болгаш 12 дугаар школаның «Тывызыксыг тыва дылдыг салгалдар бис» деп командалары каас-шиник тыва хептери-биле өскелерден тулган чараш ылгалып турганнар. 4 дугаар школаның «Салгалдар» командазы хомуска аялгалап киржикчилерге хөгжүмнүг байырын чедиргеннер.

Мөөрей беш чадалыг болган: «Таныштырылга», «Угаан-бодалды изиглендирери», «Тыва дылдың төөгүзү болгаш сайзыралы», «Сонуурганчыг тыва дылым», «Дыл болгаш литература».

Бирги черни Кызылдың 1 дугаар школазының «Тыва дылдың мөгейикчилери» командазы – башкызы Зоя Шожал,
ийиги черни Кызылдың 12 дугаар школазының «Тывызыксыг тыва дылдыг салгалдар бис» командазы – башкызы Чаяна Калындуу, үшкү черни Кызылдың 16 дугаар лицейиниң «Ыдыктар» командазы – башкызы Эмма Элбек чаалап алган. Арткан киржикчилер база куруг болбаан. Командалар тускай шаңналдарга төлептиг болган.

Национал школа хөгжүдер институттуң ажылдакчылары Ч.О. Хомушку, А.К. Салчак болгаш Кызыл хоорайның тыва дыл башкыларының каттыжыышкынының даргазы шииткекчилер кылдыр чалаттырып, түңнелдерни үндүрген.