Тыва дылдыӊ сайзыралы дээш сагыш аарып чоруур кижилерниӊ бирээзи

Тыва дылды сайзырадыры-биле чаа-чаа бодалдарны нептередир
ТР-ниң Дээди Хуралының Даргазы Каң-оол Даваа Россияныӊ Эртемнер Академиязыныӊ Дыл эртеминиӊ шинчилелдерин кылыр институдунуӊ эртем ажылдакчызы Аржаана Сюрюн-биле ужурашкан.

– Аржаана Александровна – тыва дылдыӊ кадагалалы болгаш сайзыралы дээш сагыш аарып чоруур кижилерниӊ бирээзи. Бо айтырыг тыва ниитилелде чидиг айтырыг болуп турары чажыт эвес. Ынчангаш төрээн дылывысты сайзырадырыныӊ чаа, дээштиг аргалары херек.

Аныяк эртемденниң чугаалап турары-биле алырга, ажылдап турар институду ол ажылды күштелдирип, башкыларга таарымчалыг программаны ажылдап кылып турар. Ол тыва дылды республикага массалыы-биле ажыглаар дугайында саналы-биле үлешти.

Тыва Республиканыӊ Баштыӊыныӊ Дээди Хуралга Айыткалында тыва дылды кадагалап арттырар болгаш орус дыл-биле чергелештир ону бүгү адырларга ажыглап ажылдаарын улам сайзырадыр талазы-биле ажылды күштелдирерин дааскан. Тускай күрүне комиссиязы тургустунган, Тываныӊ эртемденнери тыва дылды сайзырадырыныӊ, амгы үениӊ чаа чурагайлыг технологияларын ажыглап тургаш, таарымчалыг ийи дылды тургузарыныӊ Стратегиязын ажылдап кылып турар.

Аржаана Александровнаныӊ арга-дуржулгазы бо ажылга хереглеттине бээр дээрзи чигзиниг чок. Моон-даа соңгаар харылзааны тудуп, тыва дылды сайзырадыры-биле чаа-чаа бодалдарны нептередирин сайгарып чугаалажыр деп дугуруштувус. Бо айтырыг-биле эртемденнер-биле база аңгы ужуражыр мен. Аныяк экспертивис ышкаш, бо ажылга чүгле бодувустуӊ демниг күжениишкинивис-биле түӊнелди чедип алыр бис дээрзинге бүзүрээр мен.