Бүгү республикадан аңгы-аңгы булуңнарындан чыглып келген эге школа башкылары өөреникчилерни өөредилге талазы-биле системалыг ажылдаар арганың үндезиннеринче кииргеш, федералдыг күрүне өөредилге стандартының негелделеринге дүгжүп турар амгы үениң тыва дыл болгаштың литературлуг номчулга кичээлдеринге этнокультуралыг аргаларны ажыглап тургаш кичээлдерни тургузарынга мастер-класстарны көргузуп методологтуг херекселдерни бергенин Национал школа хөгжүдер институт дыңнаткан.
«Литературлуг номчулга кичээлдеринге эге школа өөреникчилериниң этнокультурлуг кижизидилгези. Литературлуг номчулга кичээлдеринге эге школа өөреникчилериниң этнокультурлуг кижизидилгези» деп темага КПИ-нин доцентизи, филология эртемнериниң кандидады Л.С. Кара-оол, «Эге школаның тыва дыл кичээлдеринге этнокультурлуг кижизидилгени чорудары» деп темага КПИ-нин доцентизи, педагогика эртемнериниң кандидады Н.Ч. Дамба, «Тыва Республикада ийи дылдыг болгаш поликультуралыг хүрээлел» деп темага Тываның гуманитарлыг болгаш ажыглалдыг социал-экономиктиг шинчилелдер институдунуң дыл эртеминиң секторунда шинчилекчи, филология эртемнериниң кандидады Э.К. Аннай, «Уругларның рольдап ойнаар оюну "Сайзанак" чугаа сайзырадылгазынга кичээл хевири кылдыр ажыглаары» деп темага Национал школа хөгжүдер институдунуң эртем ажылдакчызы Ч.О. Хомушку, «Ийи дылдыг уругларда диагностика болгаш коррекция дузазы-биле чугаазын эдери» деп темага республиканың психологтуг-эмчи болгаш социал деткимче талазы-биле «Сайзырал» төвүнүң чугаа эдер башкызы А.О. Монгуш өөредиглиг лекцияларын башкыларга илеткээннер.
Курстуң сөөлгу хүнүнде «Эге өөредилгениң этнокультурлуг угланыышкынын боттандырары» деп «төгерик столга» тыва дылдың сайзыралы кончуг чугула деп башкылар саналдаан, тыва дылды сайзырадырынга өөредилге программазын сайгарып чугаалашканнар. Ужуражылгада киржикчилерниң саналдарының аразында тыва дылды кадагалаары, төрээн дылын өөредириниң методиказын экижидери, эге өөредилгениң этнокультурлуг угланыышкынын болгаш «Төлевилел-21»-ни уламчылап ажылдаарын деткип саналдааннар.
Ук хемчегни Тываның өөредилге яамызының Национал школа хөгжүдер институду эрттирген.
