Национал школа хөгжүдер институттуң ажылдакчылары хоорай шинчилиг Каа-Хем суурнуң "Сылдысчыгаш" уруглар садынга “Тыва дылды утпаал, өңнүк!” деп ажык кичээлге киришкенин институт дыңнаткан.
Ажык кичээл уруглар садының тыва дыл башкызы Светлана Ондарның удуртулгазы-биле болган. Өөредилге чериниң уруглары, башкылары болгаш ада-иелер ажык кичээлге идепкейлиг киришкен.
Ажык кичээлге аалдап келген ада-иелерге болгаш башкыларга Национал школа хөгжүдер институттуң улуг методизи Анчы Хомушку болгаш биче эртем ажылдакчызы Чочагай Хомушку өг-бүлеге, бажыңга уругларынга төрээн дылын өөредип алырының аргаларын, төрээн дылының үнезин болгаш амыдыралга ажыктыын сонуургадып кичээлге киришкеннер.
Школага белеткел бөлүүнүң уруглары болгаш кижизидикчи башкылар тыва дылга тураскааткан шүлүктерни бараалгаткан.
Ада-иелер, башкылар төрээн дылынга хамаарыштыр айтырыгларны салып, чугаалажып, кичээл үре түңнелдиг болуп эрткен.