Тыва дылывысты аныяк салгалдарга байлак хевээр дамчыдар

Тыва Республиканың Дээди Хуралының даргазы
Каң-оол Давааның Тыва дылдың хүнү-биле байыр чедириишкини

Дыл – чоннуң тускайлаң, өскелерден онзагай болурунуң эң кол демдээ, сагыш-сеткилиниң илередикчизи. Бистиң дылывыс түрк уктуг. Ынчалза-даа мөңгеде кожа-хелбээ чурттап чоруур орус болгаш моол чоннарывыстың дылдарындан база хөй сөстерни үлегерлеп алган бис. Түңнелинде бир тускай, өскелерге дөмейлешпес дылдыг болдувус.

Тыва чон үе-дүптен бээр байлак культуралыг, онзагай төөгүлүг, чечен-мерген дылдыг чораан. Өгбелеривис тускай бижик чок-даа болза, бодунуң төрээн дылын аас чугаа таварыштыр салгалдан салгалче дамчыдып келген.

Үениң, депшилгениң аайы-биле дылывыс чоорту чиде берип болурунуң айыылы тургустунган. Ынчангаш уруг-дарыывыс-биле тыва дылга үргүлчү харылзажып, оларга төрээн дылының онзагайларын дамчыдып бээрин бүгү ада-иелерден дилээр-дир мен.

«Чоннуң өлүм чок чоруу – дылында» деп чогаалчы Расул Гамзатов чугаалаан. Ынчангаш тыва дылывысты моон-даа соңгаар үнелеп, ону үргүлчү ажыглап, аныяк салгалдарга байлак хевээр дамчыдып бээрин кижи бүрүзү бодунуң дорт хүлээлгези кылдыр көрүп, ону сайзырадыры-биле бүгү базымнарны кылып чорууруңарны күзевишаан, өг-бүлеңерге аас-кежикти, ажыл-агыйыңарга чедиишкиннерни йөрээп тур мен!