Чеди-Хөл кожууннуң К.Д. Оюн аттыг төп үлегер-майыктың ном саңынга тыва эки турачы, мөге Бегзи-Хуурак Донгактың 105 харлаан чырык адынга тураскааткан "Тиилелгелиг алдар аттыг күчүтен мөге" деп хемчег болуп эрткенин ном саңы дыңнаткан.
Бегзи-Хуурак Хелиң-ооловичиниң Чеди-Хөлде чурттап чоруур оглу Федор Донгакович, ооң салгалдары – Салбакай Дайынчыевна, Шолбан Кыргысович, Инна Начын-ооловнаның өг-бүлелери ном саңынга аалдап келген. Олар ат-алдарлыг кырган-ачазынын дугайында барымдаалыг болуушкуннарны чыглып келген чонга таныштырып, төрел-аймаа өгбези-биле чоргаарланып турарын чугаалаан.
Ак-Тал ортумак школазының музей эргелекчи башкылары Сайлан Кызыл-ооловна, Ольга Домбаевна, Норжун Николаевнага маадыр чаңгыс чер чурттуунуң дугайында музейде кадагалаттынып турар эдилелдерин, хеп-сынын, херекселдерин база шыгжамырда стендилерни, дерилгезин бараалгадып, онза солун төөгүп берген.
Кызыл хоорайда чурттап, ажылдап чоруур база бир салгалы Василий Амбар-оол бодунун холу-биле ыяштан чазап кылган тураскаалын музейге дамчыдары-биле эккелген. Василий Донгакович тураскаалды кылыр ыяжын маадыр кырган-ачазынын чер-чуртту Чаатыдан эккелдирип алган болгаш сес ай ишти чазап, хевирлеп, каастап турганын дыңнаткан.
Ном санынын даргазы Алефтина Сарыг-Лама база Саяна Комбу Бегзилерниң төрел-аймаанга өгбезиниң дугайында бижээн шүлүктер хөй болганда, оларга шүлүктерниң бирээзинге аялга чогаадып, чагыдарын база ном үндүрерин сүмелээн.
Ужуражылга үезинде «Эки турачы маадыр моге» деп ном делгелгези ажылдап турган. Хову-Аксының техникумунуң сургуулдары база ортумак школаның 10 биле 8-ки класстың өөреникчилери башкылары-биле хемчегге киришкен.