Тываның Чазааның хуралынга республика девискээринге энергетиктиг суксуннарны садып-сйгаарарынга немелде кызыгаарлаашкыннарны киирген хоойлу төлевилелин бадылаан. Республика хоойлузунуң төлевилели энергетиктиг суксуннар садарын бүрүнү-биле хоруур черлерниң даңзызын элээн калбарткан.
«Бо чылын Россияның Президентизи Владимир Путин келир салгалдарның кадыкшылын камгалаары-биле, бичии уругларга энергетиктиг суксуннар сатканы дээш 500 муң рубль чедир торгаалды онаар хоойлуга атты салган. Регионалдыг чаа төлевилел ындыг суксуннарны уругларга, улуг улуска-даа, ылаңгыя хөй-ниити чемненилге черлеринге садары шуут хоруглуг черлерни айыткан» – деп, Тываның Баштыңы Владислав Ховалыг бодунуң блогунда өскертилгелерни тайылбырлаан.
Дээди Хуралдың депутаттары хоойлу төлевилелин бадылаан соонда, ол суксуннарны өөредилге болгаш эмнелге ажыл-чорудулгазында ажыглап турар шөлдерге, ол ышкаш культура болгаш спорт албан черлеринге садары шуут хоруглуг апаар. Хоойлу хажыдыкчылары шыңгыы административтиг харыысалгага онаажыр.
Тываның Баштыңы боттарын кафе-барлар деп адаан, херек кырында арага садып турар черлерге хамаарыштыр харыысалга хемчеглерин күштелдирер дугайында хоойлужудулга эгелээшкинин амгы үеде Тываның прокуратуразы-биле сайгарып турарын чугаалаан.
«Оларның хөй кезии хоойлужудулга езугаар хөй-ниитиниң чемненилге черлеринге арага садарын кызыгаарлаваан дүрүмнү ажыглап турар. Чаа хоойлу төлевилели ындыг садыг-сайгарылга черлери чуртталга бажыңнарындан, школалардан болгаш өске-даа социал объектилеринден ыракка турар кылдыр негелдени шыңгыыраткан» – деп, Владислав Ховалыг демдеглээн.
Тываның ажыл-чорудулганың чамдык хевирлеринге лицензия бээр болгаш хайгаарал албанының база полицияның ажылдакчылары чаа хоойлужудулга негелделери боттанып эгелээрге, чурттакчыларындан хомудал кирген черлерже, барларже ведомстволар аразының хыналдазы доктаамал үнер апаар. Чурттакчыларның хомудалдарын бир дугаарында шиитпирлээр. Бо арганың үре-түңнелин бизнес ээлериниң “орулга чок” барларындан ойталап, хагдынганындан көрүп болур.
#Тывачазак #ТМГМедээлер #Тыва #Тывамедээ #Тывадыл #Тывамедиагрупп #Тува