2026 чылдың төнчүзүнге чедир эргижирээн чуртталга бажыңнарындан 41 кижини өскээр көжүреринге республика күрүне деткимчези кылдыр 70,2 сая рубльди алыр.
Тывада 565 дөрбелчин метр ниити шөлдүг, дораан өскээр көжүрери негеттинип турар эргижирээн ийи бажыңдан 15 өг-бүлени өскээр көжүреринге ол акша-хөреңги көрдүнген. Ол дээрге, Кызыл хоорайда Эрзинская кудумчузунда 31 дугаарлыг база Кызыл кожуунда Каа-Хем хоорай хевирлиг суурда Пионерская кудумчузунуң 26 дугаарлыг бажыңнары-дыр.
2025 чылда «Амыдыралга инфратургузуг» национал төлевилелдиң «Чурттаар оран-сава» федералдыг төлевилели езугаар аварийлиг бажыңнардан чурттакчыларны көжүрер программа боттанып эгелээн. Россияның Чазаа программаның чаа чадазын боттандырары-биле 39 регионнуң ниитизи-биле 19 млрд ажыг рубльге чагыгларын бадылаан.
«Ооң ачызында 566 муң хире дөрбелчин метр шөлдүг эргижирээн тудугларның 31,2 муң хире чурттакчылары чаа квартираларже көжүп кирер аргалыг апаар. Бо кады ажылдажылга оларга таарымчалыг чурттаар байдалдарны тургузарынче угланган» – деп, Девискээрлер хөгжүдер фондунуң чиңгине директору Василий Купызин демдеглээн.
Тывада 2019 чылдан бээр 7720 дөрбелчин метр аварийлиг чуртталга бажыңнарын өскээр көжүрүп, хөй квартиралыг 13: Кызылда алды, Хову-Аксыда чеди бажыңны тудуп, ажыглалче кииргенин демдеглезе чогуур.
Оон аңгыда аварийлиг чуртталга бажыңнарындан хамаатыларны өскээр көжүрериниң мурнуку чылдарда программазы – Чеди-Хөл кожууннуң Хову-Аксы суурда 4,6 муң дөрбелчин метр шөлдүг эргижирээн чуртталга бажыңнарындан 288 кижини өскээр көжүрерин доозар дээш, акшаландырыышкынны хаара тудар ажыл уламчылап турар.