Тываның Баштыңы Владислав Ховалыгның саналдааны-биле Тываның байырлыг хемчеглер календарында чаа байырлал — Хөй ажы-төлдүг өг-бүлелер хүнү немешкен. Ону чылдың-на сентябрьның үшкү субботазында демдеглээр. Бо чылын хөй ажы-төлдүг өг-бүлелер хүнүн сентябрь 20-де демдеглээр.
Улусчу чогаадылга бажыңынга ук байырлалга тураскааткан Тываның хөй ажы-төлдүг өг-бүлелериниң шуулганы болуп эртер. Программада элээн каш хемчеглер: хөй ажы-төлдүг өг-бүлелерни хүндүлээр езулал, ол адырны деткиириниң болгаш хөгжүдериниң амгы айтырыгларын сайгарган пленарлыг хурал болгаш байырлыг концерт кирген.
Хемчеглер программазы-биле профессионал арга-дуржулга солчулгазы болгаш чаа идеялар боттандырылгазынче угланган интерактивтиг өөредилге шөлдерин болгаш мастер-класстарны организастаар. Шуулган ниитилелдиң турум хөгжүлдезиниң үндезини кылдыр өг-бүле институдун быжыглаар шөл апаар.
Неделя дургузунда бүгү республикага Хөй ажы-төлдүг өг-бүлелер хүнүнге тураскааткан хемчеглер болур. К.И. Чуковский аттыг уруглар ном саңынга сентябрь 20-де “Кажан өг-бүле шупту кады турда, сагыш-сеткил чаңгыс” деп мөөрейлиг оюннар программазын, Тыва үндезин культура төвү октябрь 24-те «Айым, хүнүм, авам, ачам» деп республиканың өг-бүле мөөрейин эрттери планнаттынган. Сентябрь 19-та, Кызылда Аныяктар сесерлиинге, «Ачам, авам, мен – спортчу өг-бүле» деп өг-бүле эстафетазы, сентябрь 20-де Совет Тываның 5 чылы аттыг стадионга өске-даа хемчеглер болур. Ол ышкаш, сентябрь 20-де «Нацияның чарыжы» бүгү-российжи чарыш хүнүнде хөй ажы-төлдүг өг-бүлелер чарыжы болуп эртер.
ТР-ниң Күш-ажыл болгаш социал политика яамызының медээзи-биле алырга, республиканың хөй ажы-төлдүг өг-бүлелер даңзызында 18 муң хире өг-бүле бар, олар 62,5 муң назы четпээн ажы-төлдү азырап-кижизидип турар. Республикада ажы-төлдүг өг-бүлелерни деткээн элээн каш хемчеглер бар. Регионалдыг ие капиталы база аңаа хамааржыр, 2025 чылда ону 116 өг-бүле ажыглаан, эрткен үелерде 2000 ажыг өг-бүлелер ол деткимчени алган. ТР-ниң Күш-ажыл болгаш социал политика яамызының албан езузунуң сайтызындан республикада көрдүнген деткимче хемчеглериниң дугайында тодаргайы-биле билип ап болур.