Тываның командазы чурттакчыларының идепкейлиг бадылаанының түңнелинде, таарымчалыг хоорай хүрээлеңин тургузарының эң эки төлевилелдериниң бүгү-российжи мөөрейинге тиилээн.
«Казань Экспо» делегей чергелиг делгелге төвүнге, Россияның Тудуг яамызының организастааны «Биче хоорайларны база төөгүлүг суурларны хөгжүдери» Х бүгү-российжи шуулганда тиилекчилерни чарлаанын сагындыраал. ТР-ниң Н. Гастелло аттыг Национал парыгы база Бии-Хем кожуун 2026 чылда төлевилелдер боттандырыышкынче федералдыг деткимчени алыр.
Бии-Хем кожууннуң Туран хоорайда «Тываже эжик. Комсомольская кудумчузу – Беш копеек – Автовокзалды хөгжүдериниң болгаш чаагайжыдарының концепциязы» деп төлевилел мөөрейге тиилээннерниң бирээзи. Кожуун таарымчалыг хоорай хүрээлелин тургузар эки төлевилелдерниң бүгү-российжи мөөрейинге үш дугаар тиилеп турары бо, ооң мурнунда Туранга көжүп келген баштайгы орус чоннуң парыгын база төпте Кочетов кудумчузун чаагайжыткан.
Бии-Хем кожууннуң чаа төлевилели хоорайже болгаш республикаже кирер черинде белдир черге эптиг болгаш сонуурганчыг девискээрни тургузар. 825 олуттуг чаа школа тудуу-биле кады кижилер кылаштаар черлерни чаагайжыдары – онза кичээнгейде.
Россияның Тудуг яамызы, Тываның Чазаа, Тываның Тудуг яамызы, Федерация Чөвүлелиниң сенатору Шолбан Кужугет база Күрүне Думазының депутады Айдың Сарыглар эгелээшкинни боттандырарын деткээн. Дөзевилекчи Алдынай Байкара биле төөгүчү Татьяна Верещагина база чон ону деткээн. Бии-Хем кожууннуң чонунуң үзел-бодалы болгаш хөй-ниити санал-оналы төлевилел концепциязын хевирлээринге улуг ужур-дузалыг болган.
Сөөлгү беш чылда федералдыг төлевилел ачызында, эрик кыдыы, дыштанылга девискээрлери, парктар, сесерликлер, кудумчулар болгаш спортчу шөлдер дээш, шупту 170 ажыг хөй-ниити шөлдери чаагайжыттынган.