«Технопром-2025» деп делегей чергелиг технологтуг хөгжүлдениң XII шуулганының база «Чаңгыс демниг Россия» бүгү-российжи политиктиг партияның «Бодуңну шилип ал» деп федералдыг партийжи төлевилелиниң күүселдези-биле, октябрьның 30-де III бүгү-российжи эртем-технологтуг диктант болуп эртер.
Диктантының сорулгазы – чурттуң эртем-техниктиг хөгжүлдезинче кичээнгейни угландырып, салым-чаяанныг аныяктарны илередири. 2025 чылдың диктантызының темазы – «Тиилелгениң технологиялары».
12 хардан өрү назылыг күзелдиг кижилер диктантыны бижип болур. Тестиниң айтырыгларынга харыыларны онлайн-даа, тускай организастаан шөлдерге боттары-даа берип болур.
Диктантының айтырыглары Ада-чурттуң Улуг дайынының чылдарында фронтуга болгаш тылга тиилелгени хандырарынга кол рольду ойнаан янзы-бүрү адырларда – эртем болгаш медицинадан эгелээш, информация технологиялары, харылзаа болгаш шинчилел ажылынга чедир чедиишкиннерни чедип алырынга салдар чедирген технологиялар болгаш чаартылгаларже угланган болур.
Бо хүнде Тывада 10 шөлде баазалар бүрүткеттинген:
- Тываның экономиктиг сайзырал болгаш үлетпүр яамызы,
- Тываның күрүне университеди,
- Тыва Республиканың Чазааның чанында Тываның гуманитарлыг болгаш тускай социал-экномиктиг шинчилелдер институду,
- Биосферлиг шинчилелдер төвү,
- "Сылдысчыгаш" салым-чаяанныг уруглар төвү,
- Кызылдың транспорт техникуму,
- Тожу кожууннуң Тоора-Хем суурда Тываның даг-техниктиг техникуму,
- Бай-Тайга кожууннуң Тээли суурда Тываның улусчу ус-шеверлел техникуму,
- Каа-Хем кожууннуң Сарыг-Сеп суурда Тываның агротехнологиялар техникуму,
- Кызылдың 17 дугаар школазы.
III дугаар бүгү-российжи эртем-технологтуг диктантыны бижиириниң Тывада оргкомитет удуртукчузу, Тыва Республиканың Дээди Хуралының (парламентизиниң) депутады, дайынчы хөделиишкиннер хоочуну, экономика эртемнериниң кандидады, Тываның күрүне университединиң доцентизи Буян Донгак диктантыга киржиринче кижи бүрүзүн кыйгырган: «Диктантының киржикчилери ол шагның болуушкуннарынга технологиялар кандыг уржук чедиргенин, эртем болгаш техниканың аңгы-аңгы адырларында чедиишкиннерге амгы үеде кандыг салдар чедирип чоруурун билип алыр аргалыг. Диктант киржикчилерниң чүгле билин хынаар эвес, а эртем адырында дыка хөй чаа чүүлдерни билип алыр арганы бээр».
Киржикчилер канчаар киржиринден хамаан чокка, форумтехнопром.рф сайтыга баш бурунгаар бүрүткедип алыр.
Диктантының түңнели-биле шупту киржикчилерге чаңгыс рейтингини тургузар. Эки түңнелдиг киржикчилерге технология талазы-биле билиин бадыткаан сертификаттарны тыпсыр. «Технопром-2025» шуулганның шаңналдары тилекчилерни манап турар.