Тыва Республика «Кызыл» үлетпүр-бүдүрүлге хевирлиг тускай экономиктиг девискээрни ажылдадырынга белеткенип турар. Бо талазы-биле ТР-ниң Экономиктиг хөгжүлде болгаш үлетпүр яамызы боттуг инвесторларны бо төлевилелге киржиринче чалаан. Тываның Чазааның эгелээни бо төлевилел республика девискээринде экономиканың болбаазырадылга адырын хөгжүдеринче угланган.
Яамы боттуг киржикчилерни хаара тудуп болур элээн каш ажыктыг чүүлдерни, ол ышкаш амгы экономиктиг аргаларны айтып демдеглээн. Ылаңгыя Моол-биле кызыгаар чоогунда тускай экономиктиг девискээрниң таарымчалыг географтыг туружун демдеглээн – Моолдуң болгаш Барыын Кыдаттың рыноктарынче дорт үнер арганы ол бээр. Тыва Республика таварты эртер алыс кедилиг «Россия – Моол – Кыдат» транспорт коридорунуң төлевилели боттанылга чадазынче кирген. Тыва Республиканың садыг-саарылгазы 2032 чылга чедир сес катап, а чүък сөөртүлгези он катап көвүдээр деп санаан.
Тускай экономиктиг зонаның киржикчилери он чыл дургузунда өнчү-хөреңги, чер болгаш транспорт үндүрүглеринге тик хуулуг улуг деткимчени ап, ол ышкаш орулга үндүрүүнге эвээжеткен ставканы алыр. Төлевилел киржикчилеринге үндүрүг төлевирлерин үзүктеп төлээр хостуг каайлы зоназының чуруму ажылдаар, даштыкы дериг-херекселдер киир сөөрткен үндүрүглерден хосталып, барааннарны үндүрүг чокка садар арганы алыр. Республика киржикчилерге чогуур инженерлиг, транспорт болгаш энергетика инфратургузуун хандырар.
Үлетпүр-бүдүрүлге хевирлиг тускай экономиктиг девискээр Кызыл хоорайның девискээринге 60 гектар шөлдү ээлээр. Инвесторларга дараазында садып алыр кылдыр алды чер участогун хөлезиге бээри көрдүнген. Чер участогун хөлезилээн төлевириниң эң үстүкү хемчээли ооң чылда кадастр өртээниң ийи хуузу хире болур.
120 сая рубль деңнелинде доктааткан капитал салыышкынының кудуку хемчээли – киржикчилерге кол негелде ол.
«Кызыл» тускай экономиктиг девискээрге агроүлетпүр комплекизиниң, ыяш болбаазырадылгазының, чиик үлетпүрнүң бүдүрүлге объектилерин хөгжүдерин база логистика төптерин тургузарын планнап турар.
Экономиктиг хөгжүлде яамызының дыңнатканы-биле алырга, 2030 чылга чедир тускай экономиктиг зонаның инфратургузуун доозары планнаттынган, 2026 чылда бирги киржикчилерниң чагыгларын хүлээп эгелээр.
«Кызыл» тускай экономиктиг девискээр төлевилели чүгле Тываның эвес, а бүдүн макрорегионнуң экономиктиг өзүлдезиниң күчүлүг шимчедикчизи апарып, Азияда партнерлар-биле экономиктиг харылзааны быжыглаар аргалыг деп, албан черлериниң эксперттери демдеглеп турар.
Төлевилелге киржириниң дугайында айтырыгларны 8 (394) 7-74-05 дугаарлыг телефонче долгааш, салып болур. E-mail – promparktyva@mail.ru, адрези: Кызыл хоорай, Тыва эки турачылар кудумчузу, 18.