Тыва оюннар: бурунгаар хөгжүлдези болгаш деткимчези

Тыва үндезин культура төвүнге чаңчылчаан тыва оюннарның биче хевирлерин сайзырадып турар ойнакчыларны болгаш спортчуларны деткиир сорулгалыг «төгерик ширээ» болуп эрткенин төп дыңнаткан.

«Төгерик ширээге» ниитизи-биле үжен хире кижи киришкен, оларның аразында ТР-ниң спорт сайыдының хүлээлгезин күүседип турар В.Х. Тюлюш, Дээди Хуралдың депутады Н.А. Чамбалдоо, Спорттуң национал хевирлерин сайзырадыр төптүң удуртукчузу Б.К. Ушпас, педагогика эртемнериниң кандидады, ТКУ-нуң күш-культура кафедразының доцентизи О.Ч. Ондар база И.Э. Мендот, Тываның алдарлыг артизи, ТКУ-нуң аспирантызы С.Б. Монгуш, Национал школа хөгжүдер институттуң оралакчы даргазы Ч.Э. Монгуш, «Алтан Мундарга» делегей чергелиг этнокультурлуг фестивальдың киржикчилери А.Б. Шимет база О.В. Хомушку дээш оон-даа өскелер киришкен.

Хемчегниң түңнелинде, тыва национал оюннарның эдилекчилериниң хей-аъдын чүглендирип, оларга хамаарышкан “хүндүлүг аттарны” хоойлу езугаар быжыглаар ажыл-чорудулганы өөренип көөр болгаш кылып чорудар, оон аңгыда тыва оюннарның хевирлеринге дүрүмнерни чаңгыс-аайлап доктаадыр, оларны ханы шинчилээр болгаш аңаа хамаарышкан номнарны, методиктиг сүмелерни чедимчелии-биле чырыдып үндүрер.

Хендирбе сый шавары, тевек дээн ышкаш мөөрейлежип ойнаар биче хевирлерниң оюннарының тиилекчилеринге разрядтар база хүндүлүг аттарны чогаадып тыпсырын оралдажыр.

Өөредилге номнарынче тыва национал оюннарның дугайында медээлерни Национал школа хөгжүдер институт-биле демнежилгелиг шинчилел ажылдарын чорудары дээн ышкаш оон-даа өске саналдарны киржикчилер киирген.