Тыва «Регион аныяктарга» президентинт программазындан 110 сая рубльди алыр. Россияның шупту регионнары киришкен «Аныяктар болгаш уруглар» национал төлевилелди боттандырган Россияның аныяктар мөөрейинге республика тиилээн. Тываның чазааның кииргени аныяктар политиказын хөгжүдер комплекстиг программазы эң тергииннерниң бирээзи деп үнелелге төлептиг болуп, федералдыг бюджеттен субсидия алыр эргени алган.
Тываның Баштыңы Владислав Ховалыг 2026 чылдың программазы чедиишкинниг камгалаттынганын бодунуң блогунда дыңнаткан. Аныяктар политиказының инфратургузуун хөгжүдеринге субсидияны ажыглаар: «Сарыг-Сеп биле Мугур-Аксы суурларда амгы тудугларга үндезин септелгелерни чоруткаш, ийи чаа аныяктар төвүн тудар. Ак-Довурактың бот-идепкейжи аныяктарының төвү чаа модульдуг тудугну алыр, а Кызылдың Аныяктар ордузу эт-сеп болгаш дериг-херексел-биле немей дериттинер».
Оон аңгыда, аныяктар политиказының бүгү системазын комплекстиг сайгарар улуг ажылдар чоруттунар. Ындыг хыналдалар мооң мурнунда кажан-даа болбаан. Аныяктар-биле ажылдың байдалын көрүп, ооң эки болгаш кошкак талаларын илередип, боттандырылга айтырыгларын болгаш аныяктарже угланган программалар болгаш төлевилелдерниң дээштиин тодарадыр.
Бо хыналданың түңнелдеринге даянып, эрге-чагырганың аныяктар политиказы херек кырында амыдыралга дүгжүп, аныяктарның сонуургалдарынче чоокшуладырынга удуртулга шиитпирлерин хүлээп алыр. Тываның Баштыңы Владислав Ховалыг ажылдарны күштелдирер чамдык угланыышкыннарны – тодаргайлаарга, республиканың ажыл-херээнче болгаш амыдыралынче көдээ аныяктарны оон-даа идепкейлиг хаара тударын, аныяктар политиказының адырынга профессионал удуртукчуларны белеткээрин база аныяк салым-чаяанныгларны деткиириниң хевирлерин калбартырын айыткан.
«Аныяктар болгаш уруглар» национал төлевилел мөөрейинге Тыва бир дугаар эвес тиилеп турар. Республика 2022 чылда аныяктар политиказының талазы-биле боттарының төлевилелдери дээш федералдыг дузаны алган 42 регионнуң санынче кирген. Ооң соонда республика 64,4 сая рубльди хаара туткан, ону Бии-Хем биле Барыын-Хемчик кожууннарда төптерни ажыдарынга, эки турачы чорукту хөгжүдер төлевилелдерни боттандырарынга, аныяктарның сайгарлыкчы чоруун деткииринге, спорт, культура, өөредилге болгаш эртем адырында эгелээшкиннерни боттандырарынга ажыглаан.