К.И. Чуковский аттыг уруглар ном саңының ажылдакчылары Тыва Республиканың күрүне тугунуң хүнүнге тураскааткан хемчеглерни эрттирип турар.
Бөгүнгү ном саңының аалчылары – Кызылдың А.А. Алдын-оол аттыг ийи дугаар школазының 7 «в» клазының өөреникчилери. Оларга Тыва Республиканың күрүне тугунуң чылдар аайы-биле төөгүзүнүң дугайында тайылбырлаан соонда, викторинаны эрттирген. Оолдар биле уруглар айтырыгларга частырыг чок харыылааш, төөгүнү улуг кичээнгей-биле дыңнаанын бадыткаан.
Тываның күрүне тугунуң хүнүн 2023 чылдан бээр сентябрь 17-де демдеглеп эрттирип турар. Бо байырлал Тываның чонунуң сүлде-сүзүү бедииринге, төрээн чуртунга ынак болгаш хүндүткелдиг болурунга, ооң төөгүзүн билип алырынга, аныяк салгалды ада-чуртчу сеткил-хөөннүг, улуг салгалгалдарның үүле-херектеринге төлептиг кылдыр кижизидип өстүреринге салдарлыг.
«ТуваМедиаГрупп» медээлер агентилелиниң чуруктары