«Тыва Республиканың тергиин күрүне хамааты албан-хаакчызы-2025» мөөрейниң тиилекчилерин шаңнаан

Тываның Чазаанга «Тыва Республиканың тергиин күрүне хамааты албан-хаакчызы-2025» мөөрейниң түңнелдерин чарлаан.

Мөөрейниң түңнел кезээнче кирген 12 күрүне ажылдакчызы регион экономиказының чамдык адырларын хөгжүдеринге идиглиг боттуг санал-оналдарлыг төлевилелдерин комиссияга таныштырган. Тываның Баштыңының Администрация болгаш Тыва Республиканың Чазааның Аппарат удуртукчузу Юрий Ананьин тиилекчилерге шаңналдарны тывыскан.

Төлевилелдер аразында херээженнер болгаш уругларга кризис төвүн тургузары, күрүне болгаш муниципалдыг эрге-чагырга органнарының ажыл-чорудулгазының шынарын бедидери, кылымал угаан-медерелди ажыглаары, Тываның кожууннарында мал семиртир биче фермалар четкизин шенеп тургузары, сагыш-сеткил талазы-биле бергедээшкиннерлиг кижилерге «чылыг бажыңны» ажыдары деп ажылдар бар.

Мөөрейниң киржикчилери республикада девискээр хөй-ниити бот-башкарылгазын хөгжүдер, кадык амыдыралды суртаалдаар, социал болгаш экология адырларында чидиг айтырыгларны шиитпирлээр эгелээшкиннери-биле үлешкеннер.

Мөөрейге ТР-ниң Юстиция яамызының регионалдыг хоойлужудулга хөгжүдер килдис начальнигиниң оралакчызы Валерия Ооржак тиилээн. Өг-бүлезинге күчүлелге таварышкан кижилерге социал, психологтуг болгаш юридиктиг дузаны чедирер сорулгалыг «Херээженнер болгаш уругларга кризис төвү «Маяк» деп төлевилелди таныштырган.

«Даргаларым республикага өг-бүлеге күчүлел дээш административтиг харыысалганы киирер дугайында хоойлу төлевилелин ажылдап кылыр даалганы меңээ берген. Ол талазы-биле ажыл чедишпезин билгеш, өг-бүледе күчүлелди эвээжедир өске-даа хемчеглерни шинчилеп эгеледим. Бо айтырыг мени ханы дүвүредип турар, ынчангаш бо теманы шилип алган мен» – деп, тиилекчи тайылбырлаан.

ТР-ниң Күш-ажыл болгаш социал политика яамызының социал хандырылга килдизиниң консультантызы Ай-Чечек Агбаан «Сагыш-сеткил талазы-биле бергедээшкиннерлиг кижилерге чылыг бажың» деп төлевилели-биле ийиги черни чаалап алган. Төлевилел ниитилелде өг-бүлениң үнелиг чүүлдерин кадагалап арттырары, кадыкшылының байдалы-биле харык-шинээ кызыгаарлыг кижилерге чымчак хамаарылганы хевирлээри, инвалид кижилерниң бодун бадыткаарын болгаш бот-сайзыралын деткиир сорулгалыг.

«Тыва Республикада күрүне эргелеп-башкарылгазының шынарын бедидери» деп төлевилелди таныштырган Тываның Чазаанда организастыг ажыл департаментизиниң начальнигиниң оралакчызы Артыш Дандар үшкү черни алган.

Мөөрейниң тиилекчилеринге дипломнарны болгаш 50 муң рубль чедир акша шаңналдарын тывыскан.