Тыва спортчу объектилер тударынче 530 млн рубльди камгалап алган

«Күш-культура болгаш массалыг спорттуң хөгжүлдези» федералдыг программа-биле бо чоокку үш чылдарда спортчу объектилер тудар российжи регионнар санынче Тыва база кирген. Тываның Баштыңы Владислав Ховалыг Россияның Спорт яамының деткиишкини дээш өөрүп четтиргенин бодунуң телеграм-каналында дыңнаткан.

– Кызылга спорт зал база эштир бассейн тударын планнаан бис. Чоокта чаа эрткен дорт дамчыдылга үезинде республика найысылалының аңгы-аңгы микрорайоннарынга база кожууннарга спортчу шөлдерни чаагайжыдар дилеглер база кирген. Спортчу инфратургузугну албан калбартыр бис – деп, Владислав Ховалыг бижээн.

Тыва федералдыг бюджеттен алыр 530 сая рубль-биле республикага модульдуг спорт залды, эштир бассейнни база «угаанныг» спортчу шөлдерни дараазында үш чылда тудуп үндүрер. Амгы үениң эки дериг-херекселдерин салган хөй талалыг ажыглалдыг шөлдер спорт-биле өңнүктежиринге таарымчалыг.

Модульдуг залдар спорт комплекстери ышкаш болза-даа, тудуп үндүрери дүрген болгаш, ону ажыглаарының чарыгдалдары элээн камныг деп, регионнуң Спорт яамызы демдеглээн. Ындыг объектилер агаар бойдустуң кандыг-даа үезинде таарымчалыг, кыжын-даа, чайын-даа ажылдаар. Кызыл хоорайда Полигонная кудумчузунга модульдуг спортчу объектилер – зал биле бассейнни тудар.

Тываның Баштыңының даалгазы-биле тудар «уганныг» спорт шөлдерин каяа кылырын регионалдыг Спорт яамызы республика чуртакчыларның дилээ езугаар шиитпирлээр.