Тывада 12 000 ажыг уруг спортчу секцияларга халас белеткенир аргалыг

«Россияда спорт» күрүне программазының күүселдези-биле Тывада уругларның күш-культура болгаш спортка белеткенип киржир аргалары калбарган. ТР-ниң Спорт яамызынга хамааржыр 23 албан чери халас киржип болур спортчу бөлгүмнерни уругларга саналдаан.

Уругнуң назы-харындан, чурттап турар черин көрүп спорттуң хевирни саналдап турар. Республиканың спорт школалары хүреш, бокс, дзюдо, сумо, самбо, кикбоксинг, бут болгаш хол бөмбүү, баскетбол, хоккей, шыдыраа, стол теннизи, хаактыг чарыш дээш, оон-даа өске спортчу хевирлерге секциялар бар. Чамдык угланыышкыннар уругларны 6 азы 7 харлыындан хүлээп эгелээр.

Спортчу секциялар Кызыл хоорайдан аңгыда, республиканың кожууннарында база бар. Ак-Довурак, Туран, Чадаана, Шагаан-Арыг, Мугур-Аксы, Хандагайты дээш оон-даа өске черлерде кичээлдер эртип турар. Ол чүүл уругларга шилип алган спортунга бажыңының чоогунга доктаамал белеткенир алыр арганы берген.

Кожууннарның спорт школаларында спорттуң аңгы-аңгы угланыышкыннарындап шилилде улуг. Бай-Тайга кожууннуң уруглары баскетбол, бокс, кикбоксинг, хүреш, бут болгаш хол бөмбүү, сумо, дзюдо, хоккей, ча адырының секцияларынче барып болур. Сүт-Хөлда кожуунда баскетбол, бокс, дзюдо, бут болгаш хол бөмбүү, сумо, шыдыраа база чиик атлетика секцияларынга кичээлдер эгелээр.

Кызылда спортчу албан черлериниң угланыышкыннары каш янзы. «Олимп» спорт школазының уруглары дзюдо, кикбоксинг, хүреш, ча адырын база боксту шилип алыр аргалыг. Школада 800 ажыг кижизидикчи бар.

Спорттуң национал хевирлерин хөгжүдери – аңгы угланыышкын. Спорттуң национал хевирлерин хөгжүдер төпте «хүреш» база шыдыраа секциялары уругларны 7 хардан хүлээп эгелээр болза, ча адарының секциязынче 10 хардан эгелеп бижидер. Төптүң өөреникчилеринге кичээлдер база халас.

Республика кадыкшылы кызыгаарлыг уругларга база спорт-биле өңнүктежир аргаларны тургускан. Адаптивтиг спорт школазында хостуг хүреш, дзюдо, стол теннизи, шыдыраа, ча адар, пауэрлифтинг талазы-биле секциялар эртип турар. Кадыкшылы кызыгаарлыг оолдар, уруглар хууда реабилитация болгаш абилитация программазы-биле секцияларже халас баар.