ТР-ниң Аңныыр хайгааралының күрүне комитеди август 1-ден Тывада чаа аңныыр сезону ажыттынганын чарлап, аңчылар кандыг база чеже дириг амытаннарны аңнаарынга чөпшээрел бээриниң санын тодараткан. Республика Баштыңы Владислав Ховалыгның чарлыында аңнап болур черлик араатаннарга чөпшээрелдиң үстүкү хемчээлин бадылаан.
Тываның аңчылары чаа аңныыр сезонунда 295 буурну, 1259 сыынны, 4549 эликти, 1198 тооргуну, 382 тени, 8097 кишти, 52 дырбактыгны, 360 хүрең адыгны, 144 морзукту аңнап болур. Ынчалдыр чамдык аңнарны аңнаар чөпшээрел саны эрткен чылга деңнээрге көвүдээн. Ынчап кээрге, буурга чөпшээрел саны 26, теге 21, эликке 1649, дырбактыгга дөрт санга көвүдээн.
Иви, тооргу, киш болгаш чамдык аңнарга чөпшээрел саны эрткен чыл хире хемчээлге арткан ийикпе азы кызырылган. Аң бүрүзүнүң баш санының өзүп көвүдээнинден азы кызырылганындан көрүп, аңныыр нормазын тургузарын сагындыраал. Сөөлгү санаашкынның сан-чурагайындан алырга, Тываның тайгаларында адыг саны 109 баш кызырылган, 3609 турганындан 3499-та келген. Ынчангаш чаа сезонда 490 баштың орнунга 360 адыгны аңнап болур.
Республикада чамдык аң-меңге аңныыр сезону шагда эгелээн. Чижээ, август 1-ден те биле адыгны, август 20-ден сентябрь 20-ге чедир хүлбүстү, сентябрь 1-ден булан биле сыынны аңнап турар.
