Тывада 36 муң хире кижи үре-сады талазы-биле кадыкшылын хынаткан

Республикада чурттакчы чоннуң үре-сады талазы-биле кадыкшылын хынаар сорулгалыг диспансеризация программазын идепкейлиг боттандырып турар.

ТР-ниң Кадык камгалал яамызының медээзи-биле алырга, бо чылдың эгезинден бээр 35903 кижи, ооң иштинде 13275 эр, 20108 херээжен улус аңаа шинчидип хынаткан.

«Өг-бүле» национал төлевилел боттандырылгазы-биле төрүп-божудар кадыкшылга багай салдарлыг чылдагааннарны эртежик илередиринче, ол ышкаш кадык чаштар төрүттүнеринге шаптыктаар аарыгларны болдурбазынче бо шинчилгелерни эрттирер.

«Эмчи хыналдазы иштелир мурнунда, иштиг үени эрттиреринге азы ниити кадыкшылга салдар чедирер аарыгларны баштайгы чадазында тодарадырынга дузалыг. Эмчи айыылдың чылдагааннарын тодарадып, профилактиктиг арга-сүмелерни бээр» – деп, эмчилер демдеглээн.

Төрүп-божудар назы-харлыг херээжен болгаш эр улустуң эмчи шинчилгезин назы-харының аайы-биле чадаларга организастаан, профилактиктиг шинчилел азы диспансеризацияны деңге чорудар.

Шинчидер кижи бирги чадада анкетаны долдурар, оон тускай эртемниг эмчи хынаар. Херээжен чонну акушер-гинеколог шинчээш, эмиг бестерин болгаш уруг савазын хынап, микроскоптуг болгаш цитологтуг анализтерни алыр. Эр улусту уролог азы тускай белеткел эрткен хирург эмчи шинчиир.

Херек апарза немелде шинчилгелерже чорудар. Херээженнер көп-белдир органнарын база эмиг бестеринге УЗИ-ни эртип, халдавырлыг аарыгларга хынадып, катап база херээженнер эмчизинче кирер. Эр улус көп-белдир органнарынга УЗИ-ни, үре-садынга база халдавырлыг аарыгларга хынадыр.

Республиканың эмнелге албан черлеринге албан медицина камгаладылгазының хуудузу-биле шинчилгени халас эртип ап болур. Кызылда республиканың 1 дугаар эмнелгезиниң консультативтиг-диагностика поликлиниказы, республиканың консультативтиг-диагностика төвү шинчидер кижилерни хүлээп турар. Кожууннарның төп эмнелгелеринге, кожууннар аразының эмнелге төптеринге база фельдшер-акушер пунктуларынга база шинчидип болур.