2025 чылдың эгезинден бээр 8765 хамааты «Россияда ажыл» кадрлар төвүнүң Тывада офистеринден дузаны дилээн, оларның 6078-и ажылда тургустунган.
ТР-ниң Чонну ажылга хаара тудар албан чери бо чылдың тос айларының ажылының түңнелдерин үндүрүп, ооң дугайында дыңнаткан. 4318 эр, 4447 херээжен кижи ажылче тургустунарынга ачы-дузаны дилээн. Билдириишкин кииргеннерниң үш муң ажыы – 35-54 харлыг кижилер. Чонну ажылга хаара тудар албан дамчыштыр 14-15 харлыг элээдилер 270, 16-17 харлыг оолдар, кыстар 229, 18-19 харлыг 81 кижи, 20-24 харлыг 550 аныяктар билдириишкиннерни киирген.
Чыл эгезинден бээр ажылга хаара тудар төптер консультациялар болгаш өске-даа хемчеглер кирген 764 муң ажыг профугланыышкын ачы-дузазын көргүскен. Аныяктарны деткииринче угланган ачы-дузаның үжү-ле чаа ажылдап эгелээн 30 хар четпээннерге онаажыр.
«Кадрлар» национал төлевилел шугуму-биле чонну ажылче хаара тудар төптер профугланыышкын деткимчезиниң элээн каш хевирлерин көргүзүп турар: хууда болгаш бөлүк аайы-биле депшилге консультациялары, психологтуг болгаш профшилилде хыналдазы, практиктиг кичээлдер, лекциялар болгаш тренингилер, эде өөредилге болгаш билиг-мергежил бедидер программалар шилилдези, ол ышкаш хууда херээн эгелээринге арга-сүмелер бар. Кижи бүрүзүнүң сонуургалдарын, билиг-мергежилин болгаш депшип ажылдаар сорулгаларын барымдаалап, бот-тускайлаң планны тургузуп турар.
Чонну ажылга хаара тудар төптер азы «Россияда ажыл» портал таварыштыр ырактан профугланыышкын деткимчезин ап болур. Бо ачы-дуза хамаатыларның хар-назыны, эртем-билии, ажыл стажы хамаанчокка, шупту кижилерге халас болгаш чедингир.
Амгы үеде Тыва Республиканың «Россияда ажыл» порталында 600 ажыг хостуг олуттарны салган. Өөредилге адырынга (300 ажыг), кадык камгалалынга (130 ажыг) болгаш тывыш үлетпүрүнге (30 хире хостуг ажылчын олуттарга) тускай мергежилдиглер чугула херек.
Республиканың тывыш үлетпүрүнүң бүдүрүлгелеринде ортумак шалың 112029 рубль, транспортта – 75066 рубль, а электри энергетиказында – 47889 рубльден, кадык камгалалында – 53983 рубльден, а өөредилгеге – 40547 рубльден өрү шалыңнарны сүмелеп турар.
Чамдык компаниялар оон-даа бедик шалыңнарны саналдап турар. Чижээ, «Эльбрусметалл-Литий» компанияда автобус чолаачызы 180 муң рубль чедир, а автоэлектрик 200 муң рубль чедир ажылдап ап болур. Медицина адырында уруглар эмчизинге 101570 рубльден 112944 чедир, а сан башкызынга 60000-дан 70000 рубльге чедир шалыңны саналдап турар.
Ажылче хаара тудар албан чери компания төлээлери-биле дорт ужуражып, хостуг олуттар ярмаркаларын болгаш ажык шилилдени чорудуп турар. «ТБС-Логистика» КХН-ниң чоокта чаа эрттирген бир хемчээнде эң бедик эге шалыңнарны айыткан: «СЕ» категорияның чолаачызы (340 муң рублдан өрү), бульдозер машинизи (330 муң рубльдан өрү), одаар чүүл сөөртүр машинаның чолаачызы (330 муң рубльдан өрү шалыңныг) дээш, оон-даа өске ажылдарны салган.
