Тываның Чазаа автотуризм хөгжүлдезиниң регионалдыг программазын бадылаан. Тываның Баштыңы Владислав Ховалыгның чогуур албан черлеринге бир чыл бурунгаар берген даалгазы езугаар документини ажылдап кылган.
Программа регионда автооруктар болгаш өске-даа инфратургузуг хөгжүлдезиниң ажыл-чорудулгазын «Туризм болгаш аалчылар хүлээп алыры» национал төлевилел-биле дүүштүрер.
Бүгү чуртта дүрген сайзырап турар автомобиль туризмин программаның үндезининде алган. Россияның турисчи үлетпүр эвилелиниң сан-чурагайлары-биле алырга, бөгүнде автотуристер саны 42 сая четкен, азы российжилерниң 30 хире хуузу. Тускай дериттинген автобажыңнарлыг 300 муң ажыг кижи аян-чорукчулап чоруур.
Тывага кээп чораан аалчыларның ниити санында автотуристерниң үлүү база элээн өскен. Республиканың бодунуң иштинде база автотуризм идепкейлиг хөгжүп турар. Росстат медээзинден алырга, Тыва 1000 чурттакчыга онааштыр чиик машиналар санының өзүлдези-биле Сибирь федералдыг округтуң регионнар аразында дөрткү черде. Чижээ республикада «Үш хөл», «Мөңгүн даглар», «Саяннар» дээн ышкаш элээн каш автотурлар бар болгаш оларга хереглел улуг.
Программаның тургузукчулары Тывада демир-орук транспортунуң чогун база автомобильдиг аян-чорукка сонуургалдың улгатканын барымдаалааш, ол республиканың экономиктиг хөгжүлдезиниң бир шимчедикчизи апаар санап турар. Оон аңгыда, республиканың турисчи үлетпүрүнүң бирги үндезин баазазы тургустунган болганда, автомобильдиг туризм-биле холбашкан төлевилелдерни киирип тургаш, ону эде тургузар херек.
Программаның «орук картазы» езугаар 2026 чылдан 2035 чылга чедир, орук кыдыында инфратургузуу болгаш ачы-дуза объектилери, чемненилге пунктулары болгаш аян-чорукчулар чурттадыр черлер, турисчи маршруттар, бензин кудар, транспорт септээр болгаш техниктиг хандырылга станциялары, тускай дыштаныр зоналар, турисчи турлаглар болгаш өске-даа объектилер дургаар бүзүрелдиг харылзааны болгаш дүрген интернетти тургузарын болгаш хөгжүдерин көрген.
Программаның сорулгаларын күүседир дээш аңгы-аңгы дөстерден акшаландырыышкынны хаара тудары планнаттынган. Ол дээрге туризмни, транспорт системазын, информация ниитилелин болгаш массалыг информация чепсектерин хөгжүдер регионалдыг программалар-дыр.
