Республиканың шупту кожууннарындан 1900 ажыг өөреникчи чээрби дөрт өөредилге эртеминге боттарының билиглери-биле мөөрейлежип эгелээн.
Экономика, биология база информатикага бирги шенелделер болуп эрткен. Олимпиада тиилекчилери шилип алганы дээди өөредилге черинче шылгалдалар дужаавайн дужаап кирер аргалыг болур.
Тываның Баштыңы Владислав Ховалыг бодунуң блогунда ук хемчегниң ужур-дузазын демдеглээн: «Бо дээрге чүгле мөөрей эвес, а бистиң республикавысты хөгжүдер келир үениң эртемденнеринге, IT-мергежилдиглерге, шинчилекчилерге улуг старт-тыр».
Аныяк салым-чаяаныгларга ындыг улуг хемчээлдиг деткимче Россияның Президентизи Владимир Путинниң эгелээни «Аныяктар болгаш уруглар» национал төлевилелдиң күүселдези-биле болдунган дээрзин ол демдеглээн.
«Республиканың келир үези бистиң уругларывыстың угаан-медерелинде болгаш шиитпирлиг чүректеринде дээрзинге сеткилим ханызындан бүзүрээр мен. Олимпиаданың киржикчилеринге берге айтырыгларны ажып эртеринге бодунуң күжүнге бүзүрелди болгаш нарын айтырыгларны шиитпирлээринге дидим чорукту күзеп, «Силерниң күш-ажылыңар болгаш салым-чаяаныңар – бистиң эң-не үнелиг эртиневис» – деп, Владислав Ховалыг демдеглээн.
Школачылар олимпиадазының 24 эртемге регионалдыг чадазы январь 12-ден февраль 28-ке чедир уламчылаарын сагындыраал. Түңнел чаданың тиилекчилери болгаш шаңналдыг черлер ээлээн кижилер кандыг-даа дээди өөредилге черинче шылгалда чокка дужаап кирер ийикпе, азы ол эртеминге Чаңгыс аай күрүне шылгалдазынга 100 баллды чедип алыр аргалыг. Оон аңгыда делегей чергелиг олимпиадаларга киржир Россияның чыынды командаларын белеткээриниң болгаш хевирлээриниң баштайгы чыыштарынга киржир арганы алырлар.
