Бүгү-российжи партияның чаа Улусчу программазының өзээн тургузар республиканың чурттакчыларындан хамааты эгелээшкиннерни чыылдазы эгелээнин Тываның Баштыңы база «Чаңгыс демниг Россия» партияның регионалдыг салбырының секретары Владислав Ховалыг дыңнаткан. Саналдар чыылдазы естьрезультат.рф деп сайтыда чоруп турар.
Февральда чаа Улусчу программаны хевирлеп эгелээн, бүгү чуртта идепкейлиг ажыл чоруп турар. Күзелдиг кижи бүрүзү бодунуң бодалдарын болгаш эгелээшкиннерин киирип болур, а соңгулда мурнунуң чаа документизин белеткеп турда, эксперттер шупту кирген санал-оналдарны сайгарып көөр.
Сайт таварыштыр федералдыг баазаже 10 муң ажыг санал-онал кирген, ооң иштинде Тываның чурттакчылардан 90 хире эгелээшкиннер бар деп, Владислав Ховалыг дыңнаткан. Республикадан кирген эгелээшкиннерниң чартыы 25-тен 45 харга чедир чурттакчылардан болган.
«Бистиң кижи бүрүзүнге хамааржыр чугула санал-оналдар-дыр: көдээ девискээрлерни хөгжүдери, школалар болгаш эмнелгелер тудуу, малчыннарны деткиири, аныяктарның бот-башкарылгазынга байдалдарны тургузары» – деп, Тываның Баштыңы саналдарның утказын тайылбырлаан.
Владислав Ховалыг республиканың кожууннарында болгаш хоорайларында партияның тус чер салбырларының эге организациялары-биле кады шупту чурттакчылыг черлерден эгелээшкиннерни чыырын Күүсекчи комитетке дааскан. Чаңгыс-даа айтырыг кичээнгей чок артпас кылдыр, чурттап турар черлеринге ол ажылды чорудары чугула деп, Баштың демдеглээн.
Партияның улусчу программазы чурттакчы чоннуң санал-оналдарының болгаш дилеглериниң түңнели болур ужурлуг деп, «Чаңгыс демниг Россияның» даргазы Дмитрий Медведев ооң мурнунда чугаалаанын сагындыраал.
«Улусчу программа удур харылзааның үре-түңнели апаар ужурлуг. Ол хүннүң-не бистиң партиявыска кээп турар. Кижилер хүннүң-не менче бижип, дыка хөй улус силерже база (депутаттар болгаш хөй-ниити ажылдакчыларынче) бижип турар. Күрүнениң Баштыңы Президентиже үргүлчү бижип турар. Ол санал-оналдарны чиге өөренип көөр херек. Чидиг айтырыгларлыг, эң-не нептереңгей санал-оналдарны деңзүгүүрлеп, оларны шиитпирлээри-биле программаже киирер» – деп, үргүлчү бижип турар чугаалаан.
