Тываның Чазаа чижилгелиг хөгжүлдени деткиириниң хемчеглер планын бадылаан. Республиканың Баштыңы Владислав Ховалыг 2026-2030 чылдарга санаан документиге атты салган. Ында чижилгелиг хүрээлелди хөгжүдүп, сайзыраңгайжыдар тос кол бараан рыноктарын тодараткан.
Чижээ, көдээ ажыл-агый продукциязының, харылзаа ачы-дузаларының, кадык камгалалының, аалчылар бажыңнарының, хөй-ниити чемненилгениң, эм-таң садыглаашкынының, доктаамал пассажирлер аргыштырылгазының, билдингир ажыктыг казымалдар казып тыварының болгаш тускайлаттынмаан садыгларга аъш-чем садыглаашкынының рыноктарынче онза кичээнгей угланган болур.
Тываның Экономиктиг хөгжүлде яамызының дыңнатканы болза, бо дээрге элээн чижилгелиг хүрээлелди хевирлээринге байдалды тургузары негеттинип турар сайгырлыкчы ажыл-чорудулга адырлары-дыр.
«Орук картазында» көрдүнген хемчеглер административтиг шаптараазыннарны ам-даа эвээжедиринче, биче болгаш ортумак сайгарлыкчы чорукту деткииринче база социал ужур-уткалыг адырларда ачы-дузаның чедингирин бедидеринче угланган болур. Олар сайгарлыкчы ниитилежилгеге чаа аргаларны ажыдып, чурттакчы чонга барааннар болгаш ачы-дузаларның чедингирин экижидер ужурлуг.
Чижээ, шупту деңнелдиң эрге-чагырга органнары харылзаа адырында 2030 чылга чедир республиканың шупту ыраккы болгаш чедери берге суурларынче операторларны киирерин хандырар даалганы алган. Муниципалдар аразында пассажир аргыштырылгазының орулга чок маршруттарынга бюджеттен субсидияларны бээри, чаңгыс аай диспетчер албанын тургузары, хөй-ниити транспортунуң мобильдиг капсырылгазын киирери, ГЛОНАСС/GPS система-биле автобустарны чепсеглээри база өске-даа хемчеглер планнаттынган.
Тывада социал нарын адыр болур – эмнер болгаш медицина херекселдерин садып-сайгарары база чедир сайзыраваан. Республикада 149 аптека бар, оларның 112-зи хуу. Регион хууда аптекалар үлүү-биле Россияның стандарттарындан чыдып калган — амгы үеде ол 75,2 хуу, херек 86 хуудан хөй болур. Оон өске бир чидиг айтырыг – көдээ черлерде аптекаларның чедишпези.
Владислав Ховалыг республикада чижилгелиг байдалды өөрени көргеш, сөөлгү чылда биче болгаш ортумак сайгарлыкчы чорук адырында ажылдап турар кижилерниң саны ортумак деңнелден дүрген – 10 хире хууга, азы 6 муң ажыг кижиге өзүп келгенин демдеглээн. Амгы үеде экономиканың бо адырында 42,3 муң кижи ажылдап турар, оларның 24,5 муңу боттарын ажыл-биле хандырган улус.
Ооң-биле чергелештир, биче болгаш ортумак сайгарлыкчы чорук субъектилериниң саны чыл дургузунда чүгле 1,4 хуу өскен. Бо чүүл эглеп чоруур сайгарлыкчыларның боттарының ажыл-херээн тургузарынга, бараан рыноктарынче киреринге, саң-хөө алырында, консультациялар болгаш өске-даа деткимчелер алырынга бергедээшкиннерге таваржып турарын көргүзүп турар.
Бөгүнде тыва сайгарлыкчыларның саны 10 муң кижи ажып турар болганда, чижилгени хөгжүдер план езугаар кижи бүрүзүнге аңгы хамаарылганы база дузалажыр арганы тывары эрге-чагырга органнарының хүлээлгези болур деп чугаалаан.
Ооң мурнунда республикага 2022-2025 чылдарда чижилгени хөгжүдер программа ажылдап турганын сагындыраал. Экономиктиг 33 адырга чижилге хүрээлелиниң стандардын киирери кол сорулга турган. Программа регионда рыноктарны сайгарып болгаш шинчилээр, чижилге хөгжүлдезинде шаптараазыннарны илередип, оларны чайладыр шиитпирлерни ажылдап кылыр системаны тургускан.