Тывада чурагайже шилчилгениң чаа эчис сорулгазын ажылдап кылып турар

Тывада экономика, социал адырның кол адырларында база күрүне эргелеп-башкарылгазында чурагайже шилчиириниң чаа эчис сорулгазын ажылдап кылып турар.

Тываның Баштыңы Владислав Ховалыг Дээди Хуралдың депутаттарынга Айыткалының үезинде, республиканың Чурагайлыг хөгжүлде яамызынга ындыг даалганы берген. Владислав Ховалыг сорулганы салып тура, чаа «Медээлер экономиказы» деп национал төлевилелдиң кезээ болур «Кылымал угаан» төлевилелди хевирлеп турар үеде, федералдыг Чазактың шиитпирлери езугаар ындыг ажыл чоруп турарын тайылбырлаан.

Чаартынган национал төлевилел экономика адырларында база күрүне эргелеп-башкарылгазында «кылымал уганны» ажыглаарын дүргедедир, мурнакчы эртем ажылдарын, саналганың күчүзүн тургузары дээн ышкаш, Россияда «кылымал угаан» рыногунуң мурнунда турар улуг ажылдарны харыылаар. «Кижиниң бүгү-ле ажыл-чорудулгазында кылымал угаан дыка хереглелдиг апар чыдар» – деп, Тываның Баштыңы демдеглээн.

2024 чылга чедир санаан ооң мурнундагы чурагайже шилчилге эчис сорулгазында республиканың экономика, социал адырының кол угланыышкыннарында база күрүне эргелеп-башкарылгазында дыка хөй төлевилелдери үр хуусаалыг болгаш, ону он чылдарже угландырган турган.

Тываның чурагайлыг хөгжүлде сайыды Идегел Монгуш чурагайже шилчилгениң чаа эчис сорулгазын ажылдап кылыры республиканың турум хөгжүлдезин хандырырынга база хамаатыларның амыдырал чуртталгазын экижидеринге онза чугула деп демдеглээн.

– Амгы ажылдарны бүгү талазындан шинчилеп, чурагайлыг шиитпирлерни ажылдадыр аргазын илередип тывары чугула. Ол дээрге чаа технологияларның күчүзүн үнелеп, персоналды өөредир программаларны чогаадып, чогуур инфратургузугну тудары-дыр – деп, сайыт чугаалаан.
Амгы ажылдар чурагайлыг курлавырларже ажыглакчыларның дең кирерин база регионда чурагайлыг дең эвес чорукту эвээжедирин хандырар деп, Идегел Монгуш демдеглээн.

Чурагай технологияларынче шилчилге бүдүрүлгелерни, социал адырның албан черлериниң база күрүне эргелеп-башкарылга органнарының ажылының шынарын бедидер ужурлуг. Ону ажыглалче киириптерге чонга база бизнеске ачы-дуза чедирилгезиниң хевирлери көвүдеп, чурттакчы чоннуң амыдырал байдалы экижиир ужурлуг.