2022 чылда Тыва өскүс уругларны чурттаар оран-сава-биле хандырарынга чурттаар оран-сава сертификаттарын бир дугаар ажыглап эгелээн. Чурттаар оран-савага хереглелдиг бүгү бөлүктерде хамаатыларны чаңгыс катап хандырарының аргалары чедишпес болганындан ындыг хемчегни алган.
2024 чылда чедип алган күрүне программалары-биле чуртталга тудуунуң хемчээли элээн өскен-даа болза, ажыглалче киирген квартираларны 950 өскүстер алза-даа, ол оочурда турар өскүс уругларның бештиң бир кезиинге безин четпес. Ооң-биле чергелештир ол категориядан аңгыда, субсидиялыг чурттаар оран-сава алыр эргелиг чурттакчы чоннуң өске-даа элээн каш бөлүктери, оларның аразында инвалидтер, хөй ажы-төлдүг өг-бүлелер, дайын киржикчилери база ховар мергежилдиглер бар. Ынчангаш дыка хөй өскүс уруглар чурттаар оран-сава-биле хандырылганы элээн үр манаар ужурга таваржып турар.
Бо бөлүктүң хамаатыларынга чурттаар оран-сава садып алырынга социал төлевирлер программазын тургускан. Ооң сорулгазы – чиигелделиг категорияда кирип турар, 23 хар чеде берген, чурттаар оран-сава албаан, ынчалза-даа социал болгаш профессионал адаптацияны эрткен, ажыл-агыйда тургустунган, өг-бүлелиг, бодун хандыртынып шыдаар хамаатыларны, оларның аразында өскүстерни деткиир.
Программа бажың садып алырынга азы ипотека чээлизин төлээринге ажыглап болур тодаргай түңнүг акша сертификадын бээр. Тывада программа боттаныышкынының бирги чылында 19 хамаатыга социал төлевирлерни көргүскен. Бо үеде киржикчилерниң саны үш катап көвүдээн, 55 кижи четкен.
Социал төлевир аргазының онзагай чүүлү болза, бодунуң хереглелдери болгаш сонуургалдарының аайы-биле таарымчалыг чурттаар оран-саваны боттары шилип, Россия Федерациязының кайы-даа регионундан шимчевес өнчүнү садып алыр аргалыг. Хамаатылар алган сертификадынга немей боттарының чыып алган акша-хөреңгизин кадып, улуг шөлдүг чурттаар черни садып ап база болур.
Ооң-биле чергелештир өскүс уругларга чаа тудуглардан халас чурттаар черни бээрин ам-даа уламчылаар. Ындыг болзажок, чуртталга сертификадының программазын ам-даа уламчылаары кедилиг дээрзин бадыткап, аңгылаан акша-хөреңгиниң хемчээлин улгаттырып, ону алыр киржикчилерниң санын ам-даа калбартыр арганы көрүп турар.
