Тывада Covid-19 хамчыынга удур коллективтиг иммунитеттиң деңнели 15,9 хуу

ТР-ниң Кадык камгалал яамызының дыңнадып турары-биле алырга, Кызыл хоорайда, Чөөн-Хемчик база Бии-Хем кожууннарда коронавирус халдавырындан аарыг кижилер илереттинген. Арткан муниципалдыг тургузугларда ындыг таварылгалар бүрүткеттинмээн.

Республиканың кол санитар эмчизи Людмила Салчак сөөлгү аараан кижилерниң дөртү тарытпаанын, а бир кижиниң катап тарыдар үези эрте бергенин дыңнаткан. Республикада чурттакчы чонну халдавырдан камгалап тарыдар болгаш катап тарыдар ажылдар кошкак деңнелде чоруп турарын ол факт бадыткаан.

Россия Федерациязының Чазааның Дүүштүрүлге төвүнүң медээлер самбыразында сан-чурагайлардан алырга, республикада коллективтиг иммунитеттиң деңнели 15,9 хуу.

Тываның Баштыңы Владислав Ховалыг Кадык камгалал яамызынга чурттакчы чонну коронавирус халдавырындан тарыдар ажылды күштелдирип, коллектив кежигүннери тарылганы үе шаанда алыр кылдыр кады ажылдаар даалганы күүсекчи база муниципалдыг эрге-чагырга органнарының удуртукчуларынга берген.

Аарыгның хенертен көдүрлүрүн болдурбас дизе, грипп база коронавирустан тарыдып алырының эң эптиг үези бо деп, Владислав Ховалыг чугаалаан. Ынчангаш күүсекчи эрге-чагырга органнарының удуртукчулары, кожуун чагырга даргалары чону долу тарылга курузун алган турарын чедип алыр дээш, харыысалгалыын сагындырган. Ылаңгыя улуг назылыг, хоочу аарыгларлыг, иштиг херээжен чонче онза кичээнгейни углаар.

Эң эвээш кижилер тарыткан Ак-Довурак хоорай биле Барыын-Хемчик кожуун чагырга даргалары ол ажылды боттарының хайгааралынга алырын негээн. Covid-19-тан 6 ай бурунгаар тарыткан 100 749 кижи 2022 чылдың июль 24-ке чедир катап тарыдар ужурлуг.